കക്കൂസിന്റെ ഉപയോഗത്തെക്കുറിച്ച് കൃത്യമായ ധാരണയുണ്ടെങ്കിലും ചവറുകൾ നിക്ഷേപിക്കാനുള്ള ഒരിടം കൂടിയായി ടോയ്ലെറ്റിനെ പലരും കണക്കാക്കാറുണ്ട്. എന്നാലിത് പിൽക്കാലത്ത് സെപ്റ്റിക് ടാങ്കിലേക്കുള്ള പൈപ്പിൽ ബ്ലോക്ക് ഉൾപ്പെടെയുള്ള പ്രശ്നങ്ങൾ സൃഷ്ടിക്കുന്നതിന് കാരണമായേക്കാം. ടോയ്ലെറ്റിന്റെ പ്രവർത്തനം തടസം കൂടാതെ മുന്നോട്ട് പോകണമെങ്കിൽ അവയിലിടുന്ന സാധനങ്ങളെക്കുറിച്ചും ജാഗ്രത പുലർത്തേണ്ടതുണ്ട്. കക്കൂസിൽ നിക്ഷേപിച്ച് ഫ്ളഷ് ചെയ്ത് കളഞ്ഞാൽ എല്ലാം ശരിയായി എന്നുകരുതുന്നവർ ഇതൊന്നു ശ്രദ്ധിക്കൂ..
കക്കൂസിൽ നിക്ഷേപിക്കാൻ പാടില്ലാത്ത സാധനങ്ങൾ:
ബേബി വൈപ്സ്: ഫ്ളഷ് ചെയ്താൽ പോകുമെങ്കിലും ബേബി വൈപ്സ് ഒരിക്കലും ടോയ്ലെറ്റിൽ ഇടരുത്. ഇത് പിന്നീട് പ്ലംബിംഗ് പ്രശ്നങ്ങൾ സൃഷ്ടിച്ചേക്കാം..
കോട്ടൺ പാഡുകളും മറ്റ് കോട്ടൺ ഉത്പന്നങ്ങളും: കോട്ടൺ ഉത്പന്നങ്ങൾ കക്കൂസിൽ ഇട്ടാൽ ഫ്ളഷ് ചെയ്ത് പോകുമെങ്കിലും ഇവ പൈപ്പിനുള്ളിൽ ഒന്നിച്ച് കൂടിയിരുന്ന് തടസം സൃഷ്ടിക്കാനുള്ള സാധ്യതയുണ്ട്.
സാനിറ്ററി പാഡുകൾ, ടാംപോണുകൾ: പലരും സാനിറ്ററി പാഡുകൾ ഉപയോഗിച്ച് കഴിഞ്ഞാൽ അവ നേരിട്ട് കക്കൂസിൽ നിക്ഷേപിച്ച് ഫ്ളഷ് ചെയ്യാറുണ്ട്. എന്നാൽ ഇത് വളരെ പെട്ടെന്ന് ബ്ലോക്ക് ഉണ്ടാക്കുമെന്ന് തിരിച്ചറിഞ്ഞതിനാൽ പാഡുകൾ കീറി അവയ്ക്കുള്ളിലെ പഞ്ഞി മാത്രമെടുത്ത് നിക്ഷേപിക്കുകയാണ് പതിവ്. എന്നാൽ പാഡിനുള്ളിലെ പഞ്ഞിയും ടോയ്ലെറ്റിൽ നിക്ഷേപിക്കരുതെന്നതാണ് യാഥാർത്ഥ്യം. ഇവ ഫ്ളഷ് ചെയ്താൽ പോകുമെങ്കിലും പിന്നീട് പ്രശ്നം സൃഷ്ടിച്ചേക്കും. പാഡിനുള്ളിലെ പഞ്ഞി വെള്ളത്തെ ആഗിരണം ചെയ്യുമെന്നതിനാൽ ഇവ കുമിഞ്ഞുകൂടി കിടന്ന് സെപ്റ്റിക് ടാങ്കിലേക്കുള്ള പൈപ്പിനിടയിൽ തടസമുണ്ടാക്കിയേക്കാം. അതിനാൽ ടോയ്ലെറ്റിൽ ഒരിക്കലും പാഡിനുള്ളിലെ പഞ്ഞി നിക്ഷേപിക്കാതിരിക്കുക. ഇവ മാറ്റിവച്ച് ഈർപ്പം പോയതിന് ശേഷം കത്തിച്ചുകളയാൻ ശ്രമിക്കുക.
ഗർഭനിരോധന ഉറകൾ: ഇത്തരം വസ്തുക്കളും ടോയ്ലെറ്റിൽ നിക്ഷേപിക്കുന്നതിന് അനുയോജ്യമായതല്ല. ഇവ ടാങ്കിലോ പൈപ്പിലോ പിന്നീട് ബ്ലോക്ക് ഉണ്ടാക്കാൻ സാധ്യതയുണ്ട്.
ഡെന്റൽ ഫ്ളോസ്: വെറുമൊരു നൂലായ ഡെന്റൽ ഫ്ളോസ് കക്കൂസിൽ നിക്ഷേപിച്ചാൽ എന്ത് പ്രശ്നം സംഭവിക്കാനാണെന്ന് കരുതുന്നവരാണ് മിക്കയാളുകളും. എന്നാൽ ഇവയൊരിക്കലും ടോയ്ലെറ്റിൽ ഉപേക്ഷിച്ച് ഫ്ളഷ് ചെയ്യരുത്. നൂലുകൾ കൂട്ടിപ്പിണഞ്ഞ് വലയുടെ രൂപത്തിലാവുകയും ഇത് പിന്നീട് ബ്ലോക്ക് സൃഷ്ടിക്കുകയും ചെയ്തേക്കാം. സമാനമായ പ്രശ്നം തന്നെയാണ് തലമുടി കക്കൂസിൽ നിക്ഷേപിച്ചാലും സംഭവിക്കുന്നത്.
ടിഷ്യൂ പേപ്പർ: ടോയ്ലെറ്റ് പേപ്പറിന് സമാനമാണെങ്കിലും ടിഷ്യൂ പേപ്പർ കക്കൂസിലിടാൻ പാടില്ല. ഇവ ചവറ്റുകുട്ടയിൽ മാത്രമേ നിക്ഷേപിക്കാവൂ..
മരുന്നുകൾ: ബാക്കി വന്ന മരുന്നുകൾ, ടാബ്ലെറ്റുകൾ, ഗുളികകൾ എന്നിവയും ടോയ്ലെറ്റിലിടരുത്. ഇത് ചില പാരിസ്ഥിക പ്രശ്നങ്ങൾ സൃഷ്ടിച്ചേക്കാം.
ഇവ കൂടാതെ സിഗരറ്റ് കുറ്റികൾ, ച്യൂയിംങ് ഗം, ചത്ത വളർത്തുമീനുകൾ, ഭക്ഷണ അവിശിഷ്ടങ്ങൾ, ബ്ലീച്ചിംഗ് പൗഡർ എന്നിവയും ടോയ്ലെറ്റിൽ ഇടരുത്.
