വിമർശനങ്ങൾ അതിരു കടക്കുന്നുവെന്ന് നടൻ മമ്മൂട്ടി. സിനിമാ നിരൂപണങ്ങൾ ഒരിക്കലും വ്യക്തിഹത്യയാകരുതെന്നും മമ്മൂട്ടി പറഞ്ഞു. ക്രിസ്റ്റഫർ എന്ന സിനിമയുടെ പ്രചരാണാർത്ഥം ദുബായിൽ സംഘടിപ്പിച്ച പരിപാടിയിൽ മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.
സിനിമാ വിമർശനം പരിഹസിക്കലായി മാറരുത്. ചില സിനിമകൾ പ്രേക്ഷകർ കാണുന്നതിന് മുമ്പ് തന്നെ സമൂഹമാദ്ധ്യമങ്ങളിൽ വിമർശനങ്ങളുയരും. അതൊരിക്കലും പരിഹാസത്തിന്റെ രൂപത്തിലാവരുത് എന്നതാണ് അഭിപ്രായമെന്നും മമ്മൂട്ടി വ്യക്തമാക്കി. സോഷ്യൽ മീഡിയയിൽ നിലവിൽ നടക്കുന്ന സംഭവങ്ങളുടെ പശ്ചാത്തലത്തിലാണ് അദ്ദേഹത്തിന്റെ പ്രതികരണം.
ഇന്നത്തെ കാലത്ത് മലയാള സിനിമയിൽ വരുന്ന നല്ല മാറ്റങ്ങൾക്ക് കാരണം സിനിമയെ സ്വീകരിക്കുന്ന പ്രേക്ഷകരാണ്. തന്റെ ചിത്രങ്ങൾ ഫാൻസ് മാത്രമല്ല കാണുന്നതെന്നും സിനിമയെ ഇഷ്ടപ്പെടുന്ന എല്ലാവരും കാണുന്നതുകൊണ്ടാണ് ചിത്രങ്ങൾ വിജയിക്കുന്നതെന്നും മമ്മൂട്ടി പറഞ്ഞു. ഫെബ്രുവരി ഒമ്പതിനാണ് ക്രിസ്റ്റഫറിന്റെ റിലീസ്.
Comments