രാജ്യത്തെ പ്രമുഖ സംവിധായകർ അണിയിച്ചൊരുക്കുന്ന വൺ നാഷൺ വെബ് സീരീസിൽ മോഹൻലാലും കങ്കണയും എത്തുമെന്ന് റിപ്പോർട്ട്. സംവിധായകരായ പ്രിയദർശനും വിവേക് അഗ്നിഹോത്രിക്കുമൊപ്പം നാല് സംവിധായകർ കൂടി സീരിസിന്റെ ഭാഗമാകും. ഒരു മണിക്കൂർ ദൈർഘ്യമുള്ള ആറ് സീരിസുകളാണ് ഒരുക്കുന്നത്. പ്രിയദർശന്റെ സീരിസിൽ മോഹൻലാൽ പ്രധാന വേഷം കൈകാര്യം ചെയ്യും. വിവേക് അഗ്നിഹോത്രി സംവിധാനം ചെയ്യുന്ന സീരീസിലുടെയാണ് കങ്കണ എത്തുന്നത് എന്നാണ് സൂചന.
റിപ്പബ്ലിക് ദിനത്തിലാണ് വെബ് സീരീസ് ഔദ്യഗികമായി പ്രഖ്യാപിച്ചത്. രാജ്യത്തിന് നിരവധി സംഭാവനകൾ നൽകിയ എന്നാൽ അധികം പ്രശസ്തരല്ലാത്ത പ്രാദേശിക നായകൻമാരുടെ കഥകളാണ് ഓരോ സംവിധായകരും ഒരുക്കുന്നത്. വെബ് സീരീസിന്റെ പ്രവർത്തനങ്ങൾക്കായി പ്രിയദർശൻ ഇപ്പോൾ മുംബൈയിലാണ്.
ഡോ. ചന്ദ്രപ്രകാശ് ദ്വിവേദി, ജോൺ മാത്യു മാത്തൻ ,മജു ബൊഹാര, സഞ്ജയ് പുരൺസിംഗ് ചൗഹാൻ തുടങ്ങിയവരാണ് സീരിസിന്റെ ഭാഗമാകുന്ന മറ്റ് സംവിധായകർ. ഒ.ടി.ടി. റിലീസായി എത്തുന്ന സീരീസ് ആദ്യം ഹിന്ദിയിലായിരിക്കും പ്രദർശിപ്പിക്കുക. തുടർന്ന് മറ്റ് ഭാഷയിലേക്കും മൊഴിമാറ്റം ചെയ്യും.
