കളക്ടറാകണം…പോലീസാകണം….അങ്ങനെ ആഗ്രഹിക്കാത്തവർ വിരളമാണല്ലേ. നിങ്ങളുടെ സ്വപ്‌നങ്ങൾക്ക് ചിറകേകാൻ കേന്ദ്ര സർക്കാർ കൂടെയുണ്ട്. രാജ്യത്ത് സിവിൽ സർവീസ് സ്വപ്നം യാഥാർത്ഥ്യമാക്കാൻ എല്ലാവരും കടന്നു പോകേണ്ട കടമ്പയാണ് പ്രിലിമിനറി പരീക്ഷ.
ഐഎഎസ്, ഐപിഎസ് ഉൾപ്പെടെ സിവിൽ സർവീസിലെ വിവിധ വിഭാഗങ്ങളിലെ തെരഞ്ഞെടുപ്പിനുള്ള പ്രാഥമിക പരീക്ഷയായ പ്രിലിമിനറി പരീക്ഷയ്ക്ക് ഇപ്പോൾ അപേക്ഷിക്കാവുന്നതാണ്. ഓൺലൈൻ രജിസ്‌ട്രേഷന് ഫെബ്രുവരി 21-ന് വൈകിട്ട് ആറുവരെ സമയമുണ്ട്. രാജ്യമൊട്ടാകെ 1,105 ഒഴിവുകളിലേക്കാണ് ഉദ്യോഗാർത്ഥികൾക്ക് അവസരം. പ്രിലിമിനറി പരീക്ഷയ്ക്ക്, തിരുവനന്തപുരം, കൊച്ചി, കോഴിക്കോട് എന്നിവിടങ്ങളിൽ കേന്ദ്രമുണ്ട്. മെയിൻ പരീക്ഷയ്ക്ക് കേരളത്തിൽ തിരുവനന്തപുരത്ത് മാത്രമാണ് കേന്ദ്രമുള്ളത്.
പരീക്ഷയുടെ ആദ്യഘട്ടമാണ് പ്രിലിമിനറി പരീക്ഷ. പ്രിലിമിനറി പരീക്ഷയ്ക്ക് രണ്ട് പേപ്പറുകളാണുള്ളത്. ഇതിൽ മികവ് പുലർത്തിയാലേ മെയിൻ പരീക്ഷയെഴുതാൻ യോഗ്യത ലഭിക്കൂ. തുടർന്നുള്ള ഇന്റർവ്യൂവിൽ കൂടി വിജയിച്ചാലാണ്, അന്തിമ പട്ടികയിലിടം പിടിക്കാൻ കഴിയുക. സിവിൽ സർവീസ് പരീക്ഷയ്ക്ക് അപേക്ഷിക്കാൻ ബിരുദമാണ് അടിസ്ഥാനയോഗ്യത. മെയിൻ പരീക്ഷയ്‌ക്കുള്ള അപേക്ഷ സമർപ്പണമാകുമ്പോഴേക്കും ബിരുദഫലം അറിയാനിടയുള്ള നിലവിലെ അവസാന വർഷ ബിരുദ വിദ്യാർഥികൾക്കും ഇപ്പോൾ അപേക്ഷിക്കാനവസരമുണ്ട്. മെഡിക്കൽ ബിരുദക്കാർക്ക്, അവർ ഇന്റേൺഷിപ് പൂർത്തിയാക്കിയ സർട്ടിഫിക്കറ്റ് ഇന്റർവ്യൂവിന് ഹാജരാക്കിയാൽ മതിയാകും. സാങ്കേതിക ബിരുദത്തിനു തുല്യമായ പ്രഫഷനൽ യോഗ്യതയുള്ളവർക്കും പരീക്ഷയെഴുതാവുന്നതാണ്.ഇന്ത്യൻ പൗരന്മാർക്ക് മാത്രമാണ് അപേക്ഷിക്കാൻ കഴിയുക.
2023 ഓഗസ്റ്റ് ഒന്നിന് 21-32 വയസ്സ് വരെയുള്ള പൊതു വിഭാഗക്കാർക്കും 37 വയസ്സുള്ള പട്ടികജാതി/പട്ടിക വർഗ്ഗ വിഭാഗക്കാർക്കും 35 വയസ്സുള്ള പിന്നാക്ക വിഭാഗക്കാർക്കും അപേക്ഷിക്കാം. ഇത് കൂടാതെ ഭിന്നശേഷിക്കാർക്ക് 42 വയസ്സുവരെയും വിമുക്തഭടർക്ക് നിയമാനുസൃത ഇളവും ലഭിക്കും. കൂടുതൽ വിവരങ്ങൾക്കും അപേക്ഷ സമർപ്പണത്തിനും https://upsconline.nic.in സന്ദർശിക്കുക.
