ന്യൂഡൽഹി: സാമ്പത്തിക സഹകരണം, യുവാക്കൾക്ക് മുൻഗണന, എന്നീ വിഷയങ്ങൾക്ക് പ്രാധാന്യം നൽകി കേന്ദ്ര വിദേശകാര്യമന്ത്രി എസ് ജയ്ശങ്കറും ഭൂട്ടാൻ പാർലമെന്റ് സ്പീക്കർ വാങ്ചുക് നംഗ്യേലും കൂടിക്കാഴ്ച നടത്തി. ഇരുരാജ്യങ്ങളുടെയും വിവിധ മേഖലകളിലെ സൗഹാർദ്ദപരമായ സഹകരണവും ശക്തമായ സാമ്പത്തിക സഹകരണവും കൂടിക്കാഴ്ചയിൽ ചർച്ച വിഷയമായി.
വാങ്ചുക് നംഗ്യേലുമായും അദ്ദേഹത്തിന്റെ 13 – അംഗ പാർലമെന്ററി പ്രതിനിധികളുമായും സംവദിക്കാൻ സാധിച്ചതിൽ സന്തോഷമുണ്ടെന്ന് വിദേശകാര്യ മന്ത്രി ട്വിറ്ററിലൂടെ അറിയിച്ചു. ഇരുരാജ്യങ്ങളും തമ്മിലുള്ള സമാനതകളില്ലാത്ത സൗഹൃദവും സാമ്പത്തിക സഹകരണവും കൂടിക്കാഴ്ചയിലെ പ്രത്യേകതയായി. കൂടാതെ യുവാക്കൾക്ക് കൂടുതൽ മുൻഗണന നൽകുക നിരവധി പരിഷ്‌കരണങ്ങൾ നടപ്പിലാക്കുക എന്നീ വിഷയങ്ങളും സംവാദത്തിന് കൂടുതൽ ആക്കം കൂട്ടി.
കൂടാതെ കഴിഞ്ഞ 8 വർഷം കൊണ്ട് ഇന്ത്യയ്‌ക്കുണ്ടായ വലിയ മാറ്റങ്ങളെ ഭൂട്ടാൻ പ്രതിനിധി സംഘത്തിന് മുന്നിൽ തുറന്നു കാട്ടുവാൻ സാധിച്ചതിൽ അതിയായ സന്തോഷമുണ്ടെന്നും അദ്ദേഹം കൂട്ടിച്ചേർത്തു.
