മിക്ക മലയാളികളുടെയും ഇഷ്ടവിഭവമാണ് കൂർക്ക. സീസൺ വന്നു കഴിഞ്ഞാൽ പിന്നെ അടുക്കളയിലെ നിത്യ വിഭവവുമാണിത്. ഉപ്പേരി വച്ചും, മെഴുക്കുപുരട്ടിയാക്കിയും ഇറച്ചിക്കൊപ്പം ചേർത്തുമെല്ലാം കൂർക്ക ആഹാരമാക്കുന്നവരുണ്ട്. ഇത്രയേറെ പ്രിയപ്പെട്ട വിഭവമാണെങ്കിലും കൂർക്ക വൃത്തിയാക്കി പാകം ചെയ്യാൻ തയ്യാറാക്കുക എന്നത് പ്രയാസമേറിയ ജോലി തന്നെയാണ്. കുറേ സമയം കൂർക്ക നന്നാക്കാൻ വേണ്ടി ചിലവഴിക്കേണ്ടി വരുമെന്നത് തന്നെയാണ് പ്രധാന പ്രശ്നം. എന്നാൽ എത്ര കിലോ കൂർക്ക വാങ്ങിയാലും എളുപ്പത്തിൽ നന്നാക്കി എടുക്കാനുള്ള ചില സൂത്രങ്ങളിതാ..
കൂർക്ക വാങ്ങിയ ഉടനെ വെള്ളത്തിലിട്ട് വയ്ക്കുക. ഒരുപാട് നേരം വെള്ളത്തിലിട്ട് വച്ചാൽ അതിന് മുകളിലെ തൊലിയെല്ലാം പെട്ടെന്ന് അടർന്ന് പോരുന്നതാണ്. ഇത്തരത്തിൽ കുതിർന്ന് കിട്ടിയ കൂർക്ക ഒരു തുണിയിൽ കെട്ടി പൈപ്പിന് ചുവട്ടിൽ വച്ച് ഉരച്ചെടുക്കാം. ശേഷം വെള്ളത്തിലിട്ട് നന്നായി കഴുകിയാൽ തൊലിയെല്ലാം നിമിഷ നേരം കൊണ്ട് പോകുന്നതാണ്. കൂർക്ക നന്നാക്കാൻ മണിക്കൂറുകൾ ഇരിക്കേണ്ട ആവശ്യവുമില്ല, കൈകളിൽ കൂർക്കയുടെ കറയാവുകയുമില്ല.
അതുമല്ലെങ്കിൽ ഒരു തുണി സഞ്ചിയിൽ കൂർക്കയിട്ട് നല്ലപോലെ മുറുക്കി കെട്ടിയതിന് ശേഷം വാഷിംഗ് മെഷീനിൽ ഇടുക. വെള്ളമൊഴിച്ച് ഒന്ന് കറക്കിയെടുക്കുക. തുണിസഞ്ചിക്കുള്ളിൽ തന്നെ കൂർക്കയുടെ തൊലിയെല്ലാം അടർന്ന് കിടക്കുകയും കൂർക്ക വൃത്തിയാവുകയും ചെയ്യും.
Comments