വാഷിംഗ്ടൺ: അമേരിക്കയിൽ വീണ്ടും ബലൂണിന്റെ സാന്നിധ്യം റിപ്പോർട്ട് ചെയ്ത് അന്താരാഷ്ട്ര മാദ്ധ്യമങ്ങൾ. തിങ്കളാഴ്ച പുലർച്ചെ ഹവായിയിലെ ഹോണോലുലുവിന് 500 മൈൽ കിഴക്കു ഭാഗത്തായി വലിയൊരു വെളുത്ത ബലൂൺ കണ്ടെത്തിയെന്ന് നിരവധി വാണിജ്യ വിമാനങ്ങളിൽ നിന്നും സ്ഥിരീകരണം ഉണ്ടായതായി മാദ്ധ്യമങ്ങൾ റിപ്പോർട്ട് ചെയ്തു. ഏകദേശം 40,000 മുതൽ 50,000 അടി ഉയരത്തിലാണ് ബലൂൺ ഉള്ളതെന്ന് കണകാക്കപ്പെടുന്നുണ്ട്.
അജ്ഞാത വസ്തുവിനെ കണ്ടതായി ഒന്നിലധികം പൈലറ്റുമാർ അറിയിച്ചിട്ടുണ്ട്. വെളുത്ത ബലൂണിന്റെ കൃത്യമായ ഉയരം അജ്ഞാതമാണ്. ഈ ബലൂൺ ആരുടേതാണെന്നോ അത് പൊതുജനങ്ങൾക്കിടയിലുണ്ടാകുന്ന അപകടസാധ്യതയുടെ തോത് എത്രയാണെന്നോ നിലവിൽ വ്യക്തമല്ല.
ഹവായ് സംസ്ഥാനം ലക്ഷ്യമാക്കി ദിവസങ്ങൾക്ക് മുമ്പ് ചൈനീസ് ചാരബലൂൺ വെടിവെച്ചിട്ടതിന് പിന്നാലെയാണ് ഇന്ന് മറ്റൊരു ബലൂൺ പ്രത്യക്ഷപ്പെട്ടത്. ജനുവരി 28 മുതൽ യുഎസിൽ കാണപ്പെട്ട ചാര ബലൂണിനെ പ്രസിഡന്റിന്റെ നിർദ്ദേശത്തെ തുടർന്ന് അമേരിക്കൻ വ്യോമസേന വെടിവെച്ചിടുകയായിരുന്നു. ഇതിന് പിന്നാലെ തിരിച്ചടിക്കുമെന്ന് മുന്നറിയിപ്പുമായി ചൈന രംഗത്തുവന്നു.
