എറണാകുളം: എൽഡിഎഫ് കൺവീനർ ഇപി ജയരാജൻ വിവാദ വ്യവസായി ദല്ലാൾ നന്ദകുമാർ സംഘടിപ്പിച്ച പരിപാടിയിൽ പങ്കെടുത്തതിന്റെ ദൃശ്യങ്ങൾ പുറത്ത്. നന്ദ കുമാറിന്റെ മാതാവിനെ ആദരിക്കുന്ന ചടങ്ങിലാണ് അദ്ദേഹം പങ്കെടുത്തത്. സിപിഎം സംസ്ഥാന സെക്രട്ടറി എംവി ഗോവിന്ദൻ സംഘടിപ്പിക്കുന്ന ജനകീയ പ്രതിരോധ ജാഥയുംമായി സഹകരിക്കുന്നില്ലെന്ന ആക്ഷേപം ഉയർന്നതിന് പിന്നാലെയാണ് വീഡിയോ പുറത്തുവന്നിരിക്കുന്നത്.
ജനകീയ പ്രതിരോധ ജാഥ ആരംഭിക്കുന്നതിന് തലേദിവസമാണ് എറണാകുളത്ത് എത്തി ഇപി ആദരിക്കൽ ചടങ്ങിൽ പങ്കെടുത്തിരിക്കുന്നത്. കെവി തോമസിനൊപ്പമാണ് ഇപി ക്ഷേത്രത്തിൽ വെച്ച് നടത്തിയ പരിപാടിയിൽ പങ്കെടുത്തത്. ജാഥ കഴിഞ്ഞദിവസം കണ്ണൂർ ജില്ലയിൽ പ്രവേശിച്ചിരുന്നു. എന്നാൽ ജില്ലയിൽ സംഘടിപ്പിച്ച ഒരു സ്വീകരണ പരിപാടിയിൽ പോലും ജയരാജൻ എത്തിയിരുന്നില്ല. കാസർഗോഡ് നടന്ന ഉദ്ഘാടന ചടങ്ങിലും എൽഡിഎഫ് കൺവീനർ എത്തിയിരുന്നില്ല.
വരും ദിവസങ്ങളിൽ ജാഥയിൽ ഇപി ജയരാജൻ പങ്കെടുക്കുമെന്നാണ് എംവി ഗോവിന്ദൻ കഴിഞ്ഞദിവസം നൽകിയ വിശദീകരണം. വിവാദമാക്കേണ്ട സാഹചര്യമില്ലെന്നും ഇനിയുള്ള ദിവസങ്ങളിൽ എൽഡിഎഫ് കൺവീനർ യാത്രയുടെ ഭാഗമാകുമെന്നും ഗോവിന്ദൻ മാദ്ധ്യമങ്ങളുടെ ചോദ്യങ്ങൾക്ക് മറുപടിയായി വ്യക്തനമാക്കിയിരുന്നു.
എംവി ഗോവിന്ദൻ പാർട്ടി സംസ്ഥാന സെക്രട്ടറി ആകുന്നതിനോട് ഇപിയ്‌ക്ക് യോജിപ്പില്ലായിരുന്നു. പലവട്ടം അദ്ദേഹം അത് പ്രകടിപ്പിച്ചു. പി. ജയരാജൻ ഉയർത്തിയ റിസോർട്ട് അഴിമതി ആരോപണത്തിന് പിന്നിൽ എംവി ഗോവിന്ദനും പങ്കുണ്ടെന്നാണ് ഇ.പി ക്യാമ്പിന്റെ വിലയിരുത്തൽ.
