ന്യൂഡൽഹി : ഭാരതത്തിന്റെ വീരപുത്രൻ വിനായക് ദാമോദർ സവർക്കറുടെ ഓർമ്മയ്‌ക്കായി മ്യൂസിയം നിർമ്മിക്കുമെന്ന് മഹാരാഷ്‌ട്ര ടൂറിസം മന്ത്രി മംഗൾ പ്രഭാത് ലോധ . അദ്ദേഹത്തിന്റെ ജീവിതവുമായി ബന്ധപ്പെട്ട പ്രദേശങ്ങൾ ഉൾക്കൊള്ളുന്ന ഒരു സർക്യൂട്ടിനൊപ്പം അദ്ദേഹത്തിന്റെ ജന്മദേശമായ നാസിക് ജില്ലയിലെ ഭാഗൂർ ഗ്രാമത്തിലാണ് വലിയ തീം പാർക്കും മ്യൂസിയവും നിർമ്മിക്കുക .
സവർക്കറുടെ ചരമവാർഷികത്തോടനുബന്ധിച്ച് ഭാഗൂരിൽ നടന്ന പരിപാടിയിൽ സംസാരിക്കുകയായിരുന്നു അദ്ദേഹം.
“വീർ സവർക്കറുടെ ജീവിതവും ചിന്തകളും എല്ലാവർക്കും പ്രചോദനമാണ്. അദ്ദേഹത്തിന്റെ ജീവിതത്തെയും പ്രവർത്തനങ്ങളെയും കുറിച്ച് ലോകം മുഴുവൻ അറിയുന്നുവെന്ന് ഉറപ്പാക്കാൻ മഹാരാഷ്‌ട്ര സർക്കാർ പരിശ്രമിക്കുന്നു. വീർ സവർക്കർക്ക് സമർപ്പിച്ച് അന്താരാഷ്‌ട്ര നിലവാരത്തിലുള്ള ഒരു വലിയ തീം പാർക്കും മ്യൂസിയവും ഞങ്ങൾ നിർമ്മിക്കും.” ലോധ പറഞ്ഞു.
മഹാരാഷ്‌ട്ര ടൂറിസം ഡെവലപ്‌മെന്റ് കോർപ്പറേഷനാണ് തീം പാർക്കിന്റെ നടത്തിപ്പ് ചുമതലയെന്നും ഇതിന്റെ പണികൾ വേഗത്തിൽ പൂർത്തിയാക്കുമെന്നും മന്ത്രി പറഞ്ഞു.
“ഭാഗൂർ, നാസിക്കിലെ അഭിനവ് ഭാരത് മന്ദിർ, പൂനെയിലെ സവർക്കർ ചെയർ സെന്റർ, ഫെർഗൂസൺ കോളേജ് ഹോസ്റ്റൽ, സാംഗ്ലിയിലെ ബാബറാവു സവർക്കർ സ്മാരകം, രത്നഗിരിയിലെ പതിത്പവൻ മന്ദിർ (ക്ഷേത്രം), സവർക്കർ സദൻ, സവർക്കർ സ്മാരകം എന്നിവ ഉൾക്കൊള്ളുന്ന വീർ സവർക്കർ ടൂറിസം സർക്യൂട്ടും നിർമ്മിക്കും . ‘ ലോധ കൂട്ടിച്ചേർത്തു
