കെജിഎഫിന് ശേഷം കന്നഡയിൽ നിന്ന് മറ്റൊരു ആക്ഷൻ ചിത്രം കൂടി. ധ്രുവ് സർജ നായകനായി എത്തുന്ന പാൻ ഇന്ത്യൻ ചിത്രം മാർട്ടിന്റെ ആദ്യ ടീസർ പുറത്തിറങ്ങി. തീ തുപ്പുന്ന ആക്ഷൻ രംഗങ്ങളും ഇടിവെട്ട് ഫ്രെയിമുകളും കൊണ്ട് യൂട്യൂബിൽ വൈറലായിരിക്കുകയാണ് ചിത്രം. കൂടാതെ നായകന്റെ ചടുലമായ ചലനങ്ങളും പ്രേക്ഷക മനസ്സുകളെ ഇളക്കി മറിച്ചിട്ടുണ്ട്. യൂട്യൂബിൽ റിലീസായി മൂന്ന് ദിവസം പിന്നിടുമ്പോൾ 71 മില്യൺ കാഴ്ചക്കാരെയാണ് ടീസർ നേടിയെടുത്തത്.
ത്രില്ലടിപ്പിക്കുന്ന വേഷത്തിലാണ് ടീസറിൽ ധ്രുവയുടെ എൻട്രി. തനിക്കെതിരെ എത്തുന്ന ശത്രുക്കളെ തകർത്തെറിയുന്ന രംഗങ്ങളാണ് ടീസറിൽ ചിത്രീകരിച്ചിരിക്കുന്നത്. സ്ഫോടനാത്മക രംഗങ്ങളും ചിത്രത്തിന്റെ ദൃശ്യഭംഗി വർദ്ധിപ്പിക്കുന്നു. എപി അർജ്ജുന്റെ സംവിധാനത്തിൽ ഒരുങ്ങുന്ന ചിത്രം ആരാധകരെ ത്രില്ലടിപ്പിക്കുന്ന തരത്തിലാണ് ഒരുക്കിയിരിക്കുന്നതെന്ന് ടീസറിൽ നിന്നുതന്നെ വ്യക്തം. 2.33 മിനിറ്റ് ദൈർഘ്യമുള്ള ടീസർ ഇതിനോടകം തന്നെ ആരാധകർ ഏറ്റെടുത്തു കഴിഞ്ഞു.
പാകിസ്താൻ ജയിലിൽ തടവിലാക്കപ്പെട്ട നായകന്റെ മാസ് എൻട്രിയാണ് ടീസറിൽ ദൃശ്യവത്കരിച്ചിരിക്കുന്നത്. ടീസർ കണ്ടുകഴിയുന്നതോടെ പ്രേക്ഷകരിൽ ചിത്രത്തിന്റെ ഇതിവൃത്തം അറിയാനുള്ള ആകാംശയും ഉണരുന്നുണ്ട് എന്നതിൽ സംശയമില്ല. മർട്ടിൻ വളരെ ക്രൂരനാണെന്ന് ടീസറിൽ ഒരു കഥാപാത്രം പറയുന്നുണ്ട്. ഇത് സത്യമെന്ന് തോന്നിപ്പിക്കുന്ന തരത്തിലാണ് താരത്തിന്റെ ടീസറിലെ പ്രകടനം. ഏറെ ക്രൂരമായ മാനറിസവും മലപോലെ ഭയപ്പെടുത്തുന്ന ശരീരവുമായാണ് ധ്രുവ ടീസറിൽ അവതരിച്ചിരിക്കുന്നത്. വൈഭവി ഷാണ്ടില്യ, അന്വേഷി ജയിൻ, ചിക്കണ്ണ, മാളവിക അവിനാഷ്, അച്യുത് കുമാർ, നികിറ്റിൻ ധീർ, നവാബ് ഷാ, രോഹിത് പഥക് തുടങ്ങി നിരവധി താരങ്ങളാണ് സിനിമയിൽ അണിനിരക്കുന്നത്.
കന്നഡ, തെലുങ്ക്, തമിഴ്, മലയാളം, ഹിന്ദി എന്നീ ഭാഷകളിലാണ് ചിത്രം പുറത്തിറങ്ങുന്നത്. പ്രശസ്ത നടൻ അർജുൻ സർജയുടെ രചനയിൽ ഒരുങ്ങിയ കഥയാണ് ചിത്രത്തിന്റേത്. വാസവി എൻറർപ്രൈസിന്റെ ബാനറിൽ ഒരുങ്ങുന്ന ചിത്രത്തിന്റെ നിർമ്മാണം നിർവഹിക്കുന്നത് ഉദയ് കെ മെഹ്തയാണ്. ചിത്രത്തിന്റെ സംഗീതം ഒരുക്കിയിരിക്കുന്നത് രവി ബസ്രൂർ, മണി ശർമ്മ എന്നിവരാണ്. ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത് സത്യ ഹെഗ്ഡെയാണ്.
