ഭുവനേശ്വർ: ഒഡീഷയിൽ സ്വർണ നിക്ഷേപം കണ്ടെത്തി. കിയോഞ്ജർ, മയൂർഭഞ്ച്, ഡിയോഗ്ര എന്നീ ജില്ലകളിൽ നിന്നാണ് സ്വർണനിക്ഷേപം കണ്ടെത്തിയത്. സംസ്ഥാനത്തെ ഖനനവകുപ്പ് മന്ത്രി പ്രഫുല്ല മാല്ലികാണ് നിയമസഭയിൽ സംസ്ഥാനത്ത് സ്വർണനിക്ഷേപമുള്ളതായി അറിയിച്ചത്.
ഡയറക്ടറേറ്റ് ഓഫ് മൈൻസും ജിയോളജിക്കൽ സർവേ ഓഫ് ഇന്ത്യയും നടത്തിയ സർവേകളിലാണ് സംസ്ഥാനത്ത് സ്വർണ നിക്ഷേപം കണ്ടെത്തിയത്. ധങ്കനാലിൽ എംഎൽഎ സുധീർകുമാർ സമാൽ സ്വർണനിക്ഷേപത്തെ കുറിച്ച് സഭയിൽ ഉന്നയിച്ച ചോദ്യത്തിന് മറുപടിയായാണ് മന്ത്രി സ്വർണ നിക്ഷേപത്തെക്കുറിച്ച് മറുപടി നൽകിയത്.
മൂന്ന് ജില്ലകളിലെ വിവിധ സ്ഥലങ്ങളിൽ നിന്നാണ് സ്വർണം കണ്ടെത്തിയിരിക്കുന്നത്. കിയോഞ്ജഹാർ, മയൂർഭഞ്ച് ജില്ലകളിലെ നാല് മേഖലകളിലും ഡിയോഗ്രഹ ജില്ലയിലെ ഒരു സ്ഥലത്തുമാണ് നിക്ഷേപം കണ്ടെത്തിയിരിക്കുന്നത്.
