അഗർത്തല: ത്രിപുര സുന്ദരി ക്ഷേത്രത്തിൽ ദർശനം നടത്തി ത്രിപുര മുഖ്യമന്ത്രി മണിക് സാഹ. ബിജെപി ദേശീയ വക്താവ് സംബിത് പത്രയും അദ്ദേഹത്തോടൊപ്പം ക്ഷേത്രദർശനത്തിനുണ്ടായിരുന്നു.’നിയമസഭാ തിരഞ്ഞെടുപ്പ് ഫലപ്രഖ്യാപനത്തിന് മുമ്പ്, ത്രിപുര സുന്ദരി അമ്മയുടെ അനുഗ്രഹത്തിനായി ഞങ്ങൾ പ്രാർത്ഥിക്കുന്നു’ എന്ന് മണിക് സാഹ ട്വിറ്ററിൽ കുറിച്ചു. ക്ഷേത്രദർശനത്തിന്റെ ചിത്രങ്ങളും അദ്ദേഹം പങ്കുവെച്ചു.
Took blessings of Mata Tripura Sundari before the announcement of assembly poll results. pic.twitter.com/9qKwtpn5UP
— Prof.(Dr.) Manik Saha (@DrManikSaha2) March 2, 2023
ത്രിപുര, മേഘാലയ, ത്രിപുര എന്നീ മൂന്ന് വടക്കുകിഴക്കൻ സംസ്ഥാനങ്ങളിലെ വോട്ടെണ്ണൽ രാവിലെ 8 മണിക്ക് ആരംഭിച്ചു. ഫെബ്രുവരി 16-നായിരുന്നു ത്രിപുര നിയമസഭയിലേക്കുള്ള വോട്ടെടുപ്പ്. ഫെബ്രുവരി 27-നായിരുന്നു മേഘാലയ, നാഗാലാൻഡ് നിയമസഭയിലേക്കുള്ള വോട്ടെടുപ്പ്. ത്രിപുരയിൽ 50 സീറ്റുകളിലെ ഫലസൂചന പുറത്തുവരുമ്പോൾ 28 സീറ്റിൽ ബിജെപി ലീഡ് ചെയ്യുന്നു. 12 സീറ്റുകളിൽ തിപ്ര മോത മൂന്ന് സീറ്റുകളിലും കോൺഗ്രസ്- സിപിഎം സഖ്യം 19 സീറ്റികളിലും ലീഡ് ചെയ്യുന്നു.
ത്രിപുരയിലെ ഏറ്റവും പ്രശസ്തമായ ക്ഷേത്രങ്ങളിലൊന്നാണ് ത്രിപുര സുന്ദരി ക്ഷേത്രം. ത്രിപുരേശ്വരി ക്ഷേത്രം എന്നും ഇതറിയപ്പെടുന്നു. ത്രിപുരയിൽ അഗർത്തലയിൽ നിന്നും 55 കിലോമീറ്റർ അകലെ ഉദയ്പൂർ എന്ന സ്ഥലത്താണ് ഈ ക്ഷേത്രം സ്ഥിതി ചെയ്യുന്നത്. ആത്മീയതയുടെ പുണ്യവുമായി വിശ്വാസികളെ കാത്തിരിക്കുന്ന ത്രിപുരസുന്ദരി ക്ഷേത്രം, ഭാരതത്തിന്റെ അഭിമാനമായി വിശേഷിപ്പിക്കപ്പെടുന്ന ത്രിപുരസുന്ദരി ക്ഷേത്രം പുരാണങ്ങളുമായും ഐതിഹ്യങ്ങളുമായും ഏറെ ബന്ധപ്പെട്ടു കിടക്കുന്നു. കാളി ദേവിയുടെ 51 ശക്തിപീഠങ്ങളിലൊന്നാണ് ഈ ക്ഷേത്രം.
ഹൈന്ദവ വിശ്വാസമനുസരിച്ച് സതീദേവിയുടെ 51 ആയി ചിതറിത്തെറിച്ച ശരീരഭാഗങ്ങളിൽ വലത് കാൽപാദം വീണത് ഇവിടെയാണന്നാണ് വിശ്വാസം.സതീദേവീയുടെ മരണത്തെ തുടർന്ന് ദുഃഖിതനായ ശിവൻ ദേവിയുടെ ജീവനില്ലാത്ത ശരീരം തോളിലേറ്റി താണ്ഡവം ആടാൻ തുടങ്ങി. ഇതിനൊരു അവസാനം കാണാതായതോടെ താണ്ഡവം അവസാനിപ്പിക്കുന്നതിനായി വിഷ്ണുചക്രത്താൽ സതീദേവിയുടെ ശരീരം കഷ്ണങ്ങളായി ഛേദിച്ചു. സതിയുടെ വിവിധ ശരീര ഭാഗങ്ങൾ ചെന്ന് വീണ സ്ഥലങ്ങളാണ് ശക്തി സ്ഥലങ്ങൾ എന്ന പേരിൽ അറിയപ്പെടുന്നത്. അതിൽ വലതുകാൽഭാഗം വന്നു വീണ ഇവിടം പീഠസ്ഥാനമായാണ് പൂജിക്കപ്പെടുന്നത്.
