പഴയ വീടുകൾ പുതുക്കുന്നതിനിടെ നിധി ലഭിച്ച നിരവധി വാർത്തകൾ പുറത്ത് വന്നിട്ടുണ്ട്. എന്നാൽ അതിൽ നിന്ന് തികച്ചും വ്യത്യസ്തമായി ഒരു സംഭവം. വീട് പുതുക്കി പണിയുന്നതിനിടയിൽ യുകെ സ്വദേശിനിയായ സ്ത്രീക്ക് നൂറ് വർഷത്തോളം പഴക്കമുള്ള ചോക്ലേറ്റ് ബോക്സ് കിട്ടി. യുകെയിലെ ഡെവോൺ സ്വദേശിനിയായ എമ്മ യംഗ് എന്ന 51 കാരിക്കാണ് പുരാതന ചോക്ലേറ്റ് പെട്ടി കിട്ടിയത്.
വീടിന്റെ ശുചിമുറിയുടെ തറ നവീകരിക്കുന്നതിനിടയിലാണ് ചോക്ലേറ്റ് ബോക്സ് കണ്ടെത്തിയത്. തറയിലെ മണ്ണ് നീക്കം ചെയ്യുന്നതിനിടയിലാണ് കാഡ്ബറിയുടെ പർപ്പിൾ നിറത്തിലുള്ള ദീർഘ ചതുരാകൃതിയോട് കൂടിയ ഒരു കാർബോർഡ് ബോക്സ് എമ്മക്ക് ലഭിക്കുന്നത്. ബോക്സ് പുറത്തെടുത്ത് നോക്കിയെങ്കിലും അതിനുള്ളിൽ ചോക്ലേറ്റ് ഉണ്ടായിരുന്നില്ല. എന്നാൽ പെട്ടികണ്ട് അതിശയം തോന്നിയ എമ്മ കാഡ്ബറി ചോക്ലേറ്റ് കമ്പനി അധികൃതരെ സമീപിച്ചു.
1930-1934 കാലഘട്ടത്തിൽ പുറത്തിറക്കിയ ചോക്ലേറ്റിന്റെ കവറുകളാണ് എമ്മക്ക് ലഭിച്ചത് എന്ന് ചോക്ലേറ്റ് കമ്പനി അറിയിച്ചു. അതായത് ചോക്ലേറ്റ് കവറിന് ഏകദേശം 90 വർഷത്തിലധികം പഴക്കമുണ്ട്. ഇത്ര വർഷങ്ങളുടെ പഴക്കമുണ്ടായിട്ടും കവറിന് പ്രത്യേകിച്ച് കേടുപാടുകൾ ഒന്നും സംഭവിക്കാത്തതിൽ അതിശയത്തിലാണ് എല്ലാവരും.’കാഡ്ബറീസ് ഡയറി മിൽക്ക് ചോക്ലേറ്റ് നെപ്പോളിറ്റൻ’ എന്നും ഇംഗ്ലണ്ടിലെ ബോൺവില്ലെ ഗാർഡൻ വില്ലേജിൽ നിർമ്മിച്ചത് എന്നും കവറിൽ പ്രിൻറ് ചെയ്തിട്ടുണ്ട്.
താങ്കൾക്ക് സമ്പന്നമായ ഒരു പൈതൃകം ഉണ്ടെന്നും, ഏകദേശം 200 വർഷമായി ബ്രിട്ടീഷ് സംസ്കാരത്തിന്റെയും പൈതൃകത്തിന്റെയും ഭാഗമാണ് തങ്ങളെന്നുമാണ് ചോക്ലേറ്റ് കമ്പനി വക്താക്കൾ പ്രതികരിച്ചത് . 1930 കളിൽ ഡയറി മിൽക്ക് നെപ്പോളിയൻ ചോക്ലേറ്റിന് ജനങ്ങൾക്കിടയിൽ വലിയ പ്രചാരം ലഭിച്ചിരുന്നുവെന്നും, അതിന്റെ ഓർമ്മപ്പെടുത്തലായി ഇപ്പോൾ ഈ കവർ ലഭിച്ചതിൽ തങ്ങൾക്ക് സന്തോഷമുണ്ടെന്നും കമ്പനി വെളിപ്പെടുത്തി. ഇംഗ്ലണ്ടിലെ ബർമിംഗ്ഹാമിൽ 1905- ലാണ് കാഡ്ബറിയുടെ ഉടമസ്ഥതയിൽ ഡയറിമിൽക് ചോക്ലേറ്റ് ഫാക്ടറി ആരംഭിക്കുന്നത്.
