കൊച്ചി: മുൻ കാമുകൻ തന്നെ മാനസികമായും ശാരീരികമായും പീഡിപ്പിച്ചെന്ന ആരോപണവുമായി നടി അനിഖ വിക്രമൻ. മുൻ കാമുകൻ അനൂപ് പിളളക്കെതിരെയാണ് താരത്തിന്റെ ആരോപണം. മർദ്ദനത്തിൽ പരിക്കേറ്റതിന്റെ ചിത്രങ്ങൾ താരം സാമൂഹിക മാദ്ധ്യമത്തിലൂടെ പുറത്തുവിട്ടു. സംഭവത്തിൽ പോലീസിൽ പരാതിപ്പെട്ടതായും താരം ചിത്രങ്ങൾക്കൊപ്പം കുറിച്ചു.
കഴിഞ്ഞ കുറച്ച് വർഷങ്ങളായി അനൂപ് താരത്തെ മാനസികമായും ശാരീരികമായും പീഡിപ്പിക്കുകയായിരുന്നു. രണ്ടാം തവണ ഉപദ്രവിച്ചപ്പോഴാണ് ബാംഗ്ലൂർ പൊലീസിൽ പരാതി നൽകിയത്. ചെന്നൈയിൽ വെച്ചായിരുന്നു നടിയെ മുൻകാമുകൻ ആദ്യം മർദ്ദിച്ചത്. ആദ്യത്തെ സംഭവത്തിൽ അനൂപിന്റെ ക്ഷമാപണത്തെ തുടർന്ന് പരാതിപ്പെട്ടില്ലെന്നും അനിഖ പറയുന്നു. വീണ്ടും അനൂപ് മർദ്ദിച്ചപ്പോഴാണ് പരാതിപ്പെട്ടത്. എന്നാൽ അനൂപ് പോലീസിനെ പണം കൊടുത്ത് വശത്താക്കിയെന്നും താരം ആരോപിക്കുന്നു.
സിനിമാ ഭാവി തകർക്കുന്നതിന് വേണ്ടി നടിയുടെ ഫോൺ എറിഞ്ഞ് തകർക്കുകയും നടിയുടെ മുഖത്ത് മർദ്ദിച്ച് പരിക്കേൽപ്പിച്ചെന്നും താരം പറഞ്ഞു. ശാരീരികമായും മാനസികമായും ശരിയാകാൻ കുറച്ചധികം ദിവസം വേണ്ടി വന്നെന്നും അനിഖ കൂട്ടിച്ചേർത്തു.
