സിനിമ,സാമൂഹിക, രാഷ്‌ട്രിയ പ്രവർത്തക എന്നീ നിലകളിൽ വ്യക്തമായ നിലപാട് കാത്തുസൂക്ഷിക്കുന്ന വ്യക്തിയാണ് ഖുശ്ബു സുന്ദർ. തമിഴ്‌നാട്ടിലും കേരളത്തിലുമുൾപ്പടെ നിരവധി ആരാധകരാണ് താരത്തിനുള്ളത്. അടുത്തിടെയാണ് താരം ദേശീയ വനിത കമ്മീഷൻ അംഗമായി ചുമതലയേറ്റത്. രാഷ്‌ട്രിയവിഷയങ്ങളിൽ സജീവമായി അഭിപ്രായങ്ങൾ പങ്കുവയ്‌ക്കുന്ന ഖുശ്ബുവിന്റെ സമൂഹമാദ്ധ്യമങ്ങളിലെ പോസ്റ്റുകളെല്ലാം തന്നെ വളരെയധികം ശ്രദ്ധ നേടാറുണ്ട്. ഇപ്പോഴിതാ വിവാഹ വാർഷികത്തോടനുബന്ധിച്ച് ഖുശ്ബു പങ്കുവെച്ച ചിത്രങ്ങൾ വൈറലായിരിക്കുകയാണ്.
‘ഒപ്പമുള്ള യാത്ര തുടരുന്നു! ഞങ്ങളുടെ ജീവിതത്തിലെ മനോഹരമായ നാല് ചിത്രങ്ങൾ. അന്നുമുതൽ ഇന്നുവരെ ഒരുമാറ്റവും വന്നിട്ടില്ല. എപ്പോഴും എന്നോടൊപ്പം ഉണ്ടായിരിക്കുന്നതിന് നന്ദി. സ്‌നേഹിക്കുക, വഴക്കിടുക, ശാസിക്കുക, എല്ലാത്തിനുമുപരിയായി എന്നെ മനസ്സിലാക്കുക, എന്നെ സ്‌നേഹിക്കുക. ഞാൻ എന്താണോ അത് നിങ്ങൾ അംഗീകരിക്കുന്നു. നിങ്ങളെ വിവാഹം ചെയ്തത് അനുഗ്രഹമായാണ് ഞാൻ കാണുന്നത്. 23 വർഷങ്ങൾ, പ്രിയപ്പെട്ട ഭർത്താവിന് ആശംസകൾ.’ എന്നാണ് ഇൻസ്റ്റ്ഗ്രാമിലൂടെ പങ്കുവെച്ച ചിത്രത്തിന് താഴെ ഖുശ്ബു കുറിച്ചത്. നിരവധി ആരാധകരാണ് താരത്തിന്റെ പോസ്റ്റിന് താഴെ കമന്റുകളുമായി എത്തിയത്.
അതേസമയം, അടുത്തിടെ ഖുശ്ബു തന്റെ കുട്ടിക്കാലത്ത് സ്വന്തം കുടുംബത്തിൽ നിന്ന് തന്നെ നേരിടേണ്ടി വന്ന ലൈംഗിക ചൂഷണത്തെക്കുറിച്ച് വെളിപ്പെടുത്തിയിരുന്നു. എട്ടാം വയസ്സിൽ അച്ഛൻ തന്നെ ലൈംഗികമായി ചൂഷണം ചെയ്തുവെന്നാണ് ഖൂശ്ബു വെളിപ്പെടുത്തിയത്. വെളിപ്പെടുത്തൽ വിവാദമായതോടെ മറുപടിയുമായി താരം രംഗത്തെത്തിയിരുന്നു. തുറന്നു പറച്ചിലിൽ ലജ്ജിക്കുന്നില്ലെന്നും ഇത് സ്ത്രീകൾക്ക് കൂടുതൽ പ്രചോദനം നൽകുമെന്നും ഖുശ്ബു പറഞ്ഞു.
ദ ബേണിംഗ് ട്രെയിൻ എന്ന ബോളിവുഡ് ചിത്രത്തിലൂടെയാണ് ഖുശ്ബു അഭിനയജീവിതം ആരംഭിക്കുന്നത്. പിന്നീട് ഖുശ്ബു തെന്നിന്ത്യൻ സിനിമലോകത്തിന് പ്രിയങ്കരിയായി മാറുകയായിരുന്നു. നിലവിൽ ദേശിയ നിർവാഹക സമിതി അംഗമാണ്.
