തിരുവനന്തപുരം : വനിതകളുടെ സുരക്ഷക്കായി നിർഭയം ആപ്പ് അവതരിപ്പിച്ച് കേരള പോലീസ്. മൊബൈലിൽ ഡൗൺ ലോഡ് ചെയ്തിട്ടുള്ള ആപ്പിലെ ബട്ടണിൽ 2 സെക്കൻഡ് അമർത്തിടിച്ചാൽ മാത്രം മതിയാകും. അടുത്ത മിനിറ്റിൽ പോലീസ് കൺട്രോൾ റൂമിൽ നിന്ന് ഫോണിലേക്ക് വിളിയെത്തും. ഫോൺ കോൾ നടന്ന് ഏഴ് മിനിറ്റിനുള്ളിൽ പോലീസ് അടുത്തെത്തും. വനിതകളുടെ സുരക്ഷയ്‌ക്കായി ആപ്പ് അവതരിപ്പിച്ചെങ്കിലും വേണ്ടത്ര പ്രചരണം ഇതിന് ലഭിച്ചിട്ടില്ല.
തിരക്കേറിയ തിരുവനന്തപുരം നഗരത്തിൽ 4,000 സ്ത്രീകൾ മാത്രമാണ് ആപ്പ് ഡൗൺലോഡ് ചെയ്ത് ഉപയോഗിക്കുന്നത്. ഒരു ലക്ഷം പേരിലേക്ക് ആപ്പ് എത്തിക്കുക എന്നതാണ് ലക്ഷ്യം. ഇതിന്റെ ഭാഗമായി സിറ്റി പോലീസ് കമ്മീഷണർ എച്ച് നാഗരാജുവിന്റെ നേതൃത്വത്തിൽ പ്രവർത്തനം തുടങ്ങി. എന്നാൽ ആപ്പ് ഉപയോഗിക്കുന്നവരുടെ എണ്ണം വർദ്ധിച്ചു വരുന്നുമുണ്ട്.
കഴിഞ്ഞദിവസം കിഴക്കേകോട്ടയിൽ ബസിൽ വച്ച് ശല്യം ചെയ്ത യുവാവിനെ കൈകാര്യം ചെയ്യുന്നതിന് യുവതി ആപ്പ് ഉപയോഗിച്ചിരുന്നു. പെൺകുട്ടി ആപ്പിൽ അമർത്തി അഞ്ച് മിനിറ്റിനകം പോലീസെത്തി ബസ് തടഞ്ഞ് നിർത്തി യുവാവിനെ അറസ്റ്റ് ചെയ്യുകയായിരുന്നു. നിർഭയം ആപ്പിൽ നിന്ന് വരുന്ന സന്ദേശങ്ങളിൽ ഉടൻ പ്രതികരിക്കുന്നതിന് വേണ്ടി കൺട്രോൾ റൂമിലും പോലീസ് സ്‌റ്റേശഷനുകളിലും പ്രത്യേക സംഘത്തെ നിയോഗിച്ചിട്ടുണ്ട്.
പ്ലേ സ്റ്റോറിൽ നിന്നും ആപ്പ് സ്റ്റോറിൽ നിന്നും നിർഭയം ആപ്പ് ഡൗൺലോഡ് ചെയ്യാവുന്നതാണ്. ഉപയോക്താവിന്റെ പേരും ഫോൺനമ്പറും ആപ്പിൽ രേഖപ്പെടുത്തേണ്ടതുണ്ട്. ആവശ്യഘട്ടങ്ങളിൽ ആപ്പ് ഓപ്പൺ ചെയ്ത് അമർത്തിപിടിക്കുമ്പോൾ പോലീസിന് സന്ദേശം ലഭിക്കും.
