മലപ്പുറം : സർക്കാർ മദ്യത്തിന്റെ വില ക്രമാതീതമായി ഉയർത്തുന്നതിനെതിരെ നിലമ്പൂരിൽ മദ്യപർ ധർണ സംഘടിപ്പിച്ചു. നിലമ്പൂർ ചെട്ടിയങ്ങാടി പഴയ ബസ് സ്റ്റാൻഡിന്റെ സമീപമാണ് മദ്യപാനികൾ വേറിട്ട പ്രതിഷേധം നടത്തിയത്.
നികുതിദായകരോട് നീതി പുലർത്തണമെന്നാവശ്യപ്പെട്ടും മദ്യപർ പ്രതിഷേധിച്ചു. സർവകേരള മദ്യപരെ സംഘടിക്കുവിൻ, നഷ്ടപ്പെടുവാൻ ഇല്ലൊന്നും ദിവസക്കൂലി കാശല്ലാതെ എന്നും എഴുതിയ ബാനറുകൾ ധർണ്ണയിൽ ഉയർത്തിക്കാട്ടി. സംസ്ഥാന സർക്കാർ മദ്യത്തിന്റെ വില ക്രമാതീതമായി വർധിപ്പിച്ചതിൽ പ്രതിഷേധിക്കാൻ ആരുമില്ലെന്നും, തങ്ങളുടെ വിഷമങ്ങൾ തങ്ങൾ തന്നെ ഉന്നയിക്കണമെന്നും പ്രതിഷേധക്കാർ പറഞ്ഞു.
കേരളത്തിൽ ഇന്ന് മദ്യത്തിന്റെ വില ഉയർന്നുകൊണ്ടേയിരിക്കുകയാണ്. ഇങ്ങനെ പോയാൽ നിത്യ ചെലവ് കഴിഞ്ഞ് വീട്ടിൽ കൊടുക്കാൻ പോലും പൈസയുണ്ടാവില്ലെന്നും മദ്യപർ പ്രതിഷേധത്തിൽ ആശങ്ക പങ്കുവെച്ചു. സാധാരണക്കാരൻ 700 മുതൽ 800 രൂപക്ക് പണിയെടുക്കുന്നവരാണ്. വളരെ മോശം സാഹചര്യത്തിലേക്കാണ് കേരളത്തിലെ മദ്യവില പോകുന്നതെന്നും ധർണ്ണയിൽ സംസാരിച്ചവർ പറഞ്ഞു.
Comments