ഇന്ത്യൻ സിനിമയെ ലോക നെറുകയിലെത്തിച്ച സിനിമകളിലെത്തിച്ച ഒന്നാണ് ആർആർആർ. ഓസ്കർ സ്വന്തമാക്കി ഇന്ത്യൻ സിനിമയുടെ കരുത്ത് ലോകത്തിന് മുന്നിൽ അടയാളപ്പെടുത്തിയാണ് ആർആർആർ ടീം ഇന്ത്യയിലേയ്ക്ക് തിരിച്ചെത്തിയത്. ആർആർആർ എന്ന ബ്രഹ്മാണ്ഡ സിനിമയ്ക്കു പുറമെ രാം ചരൺ എന്ന താരവും ലോക സിനിമാ പ്രേമികളുടെ ഇടയിൽ ഹരമായി മാറിയിരുന്നു. വലിയ സ്വീകരണമാണ് രാം ചരണിനും ജൂനിയർ എൻടിആറിനും ലോകവേദികളിൽ ലഭിച്ചത്. ഇപ്പോഴിതാ, മറ്റൊരു സന്തോഷ വാർത്ത കൂടി പുറത്തു വരുന്നുണ്ട്. ഹോളിവുഡിലേയ്ക്കുള്ള തന്റെ അരങ്ങേറ്റത്തെ കുറിച്ച് തുറന്നു പറഞ്ഞിരിക്കുകയാണ് രാം ചരൺ.
‘ഓസ്കറിൽ പങ്കെടുത്ത് തിരിച്ചെത്തിയ രാം ചരൺ ഇന്ത്യാ ടുഡേ കോൺക്ലേവിൽ പങ്കെടുത്തു സംസാരിക്കുകയായിരുന്നു. ഹോളിവുഡ് അരങ്ങേറ്റം ഉണ്ടാകുമോ എന്ന ചോദ്യത്തിനാണ് രാം ചരൺ ഉത്തരം നൽകിയത്. ‘അറിയില്ല സർ. കഴിവുള്ളവരെ അംഗീകരിക്കുന്ന ഹോളിവുഡ് സിനിമാ മേഖലയിൽ പ്രവർത്തിക്കാൻ ആർക്കാണ് താത്പര്യമില്ലാത്തത്. ഒരു ഹോളിവുഡ് ചിത്രത്തിൽ പ്രവർത്തിക്കാനൊരുങ്ങുകയാണ് ഞാനും. സമയം ഇപ്പോൾ അനുകൂലമാണ്. കൃത്യമായ ഒരു തീരുമാനമെടുത്തതിന് ശേഷം മാത്രമേ എന്തെങ്കിലും പ്രഖ്യാപിക്കാൻ ഞാൻ ആഗ്രഹിക്കുന്നുള്ളൂ. എന്നാൽ ഇപ്പോൾ കാര്യമായ പുരോഗതിയുണ്ടെന്ന് എനിക്ക് പറയാൻ കഴിയും. എല്ലാം ഒരു പ്രക്രിയയാണ്. അത് നടക്കട്ടെ. അതു സംഭവിക്കും’.
‘ആർആർആർ തങ്ങളുടെ കരിയറിൽ ഏറ്റവും പ്രധാനപ്പെട്ട സിനിമയാണ്. ഇന്ത്യൻ സിനിമാ ചരിത്രത്തിലും ഈ ചിത്രം അറിയപ്പെടും. ഓസ്കർ ലഭിച്ചത് ഇപ്പോഴും ഒരു സ്വപ്നം പോലെയാണ് എനിക്ക് തോന്നുന്നത്. കൂടെ നിന്ന എല്ലാവർക്കും ഒരുപാട് നന്ദി. എസ്എസ് രാജമൗലിയും എംഎം കീരവാണിയും ഇന്ത്യൻ സിനിമാ വ്യവസായത്തിലെ ഏറ്റവും വിലപ്പെട്ട രത്നങ്ങളാണ്. ഈ മാസ്റ്റർപീസിന്റെ ഭാഗമാകാൻ എനിക്ക് അവസരം നൽകിയതിന് രണ്ടുപേർക്കും നന്ദി. നാട്ടു നാട്ടു ലോകമെമ്പാടുമുള്ള ഒരു വികാരമായി മാറി’- എന്നും രാം ചരൺ പറഞ്ഞു.
