മുത്തച്ഛന്റെ ഓർമ്മയ്ക്കായി സൈക്കിൾ യാത്രികർക്ക് സൗജന്യമായി ലൈറ്റ് വിതരണം ചെയ്ത് യുവതി. ഉത്തർപ്രദേശിലെ ലഖ്‌നൗ സ്വദേശിയായ ഖുഷി എന്ന യുവതിയാണ് സൈക്കിൾ യാത്രികരെ അപകടങ്ങളിൽ നിന്ന് രക്ഷിക്കുന്നതിനായി റെഡ് ലൈറ്റ് വിതരണം ചെയ്തത്. തന്റെ മുത്തച്ഛന്റെ അപ്രതീക്ഷിത വിയോഗമാണ് യുവതിയെ ഇതിന് പ്രേരിപ്പിച്ചത്.
സൈക്കിളിൽ യാത്രചെയ്തുകൊണ്ടിരിക്കെ പിന്നിൽ നിന്നെത്തിയ കാർ ഇടിച്ചാണ് ഖുഷിയുടെ മുത്തച്ഛൻ മരിക്കുന്നത്. രാത്രി ആയിരുന്നതിനാൽ സൈക്കിൾ യാത്രികനായ മുത്തച്ഛനെ കാർ ഡ്രൈവർ കാണാതിരുന്നതാണ് അപകടത്തിന് കാരണം. 2020ലായിരുന്നു സംഭവം നടന്നത്.
ഏറെ പ്രിയപ്പെട്ട മുത്തച്ഛന്റെ അകാലത്തിലുള്ള വേർപാട് ഖുഷിയെ തളർത്തിയിരുന്നു. തുടർന്ന് തന്റെ മുത്തച്ഛന് സംഭവിച്ചത് പോലെയൊരു അപകടം വീണ്ടും ആവർത്തിക്കരുതെന്ന ലക്ഷ്യത്തോടെ സൈക്കിൾ യാത്രികർക്ക് റെഡ് ലൈറ്റുകൾ വിതരണം ചെയ്യുകയായിരുന്നു യുവതി. ഏകദേശം 1500 സൈക്കിൾ യാത്രികർക്ക് ഇതിനോടകം ലൈറ്റുകൾ നൽകി കഴിഞ്ഞു. തന്നെപ്പോലെ മറ്റാർക്കും പ്രിയപ്പെട്ടവരെ നഷ്ടപ്പെടാതിരിക്കാനാണ് ഇത് ചെയ്യുന്നതെന്നും ഖുഷി പ്രതികരിച്ചു.
ഐഎഎസ് ഉദ്യോഗസ്ഥനായ അവനീഷ് ശരൺ ആണ് ട്വിറ്ററിലൂടെ ഖുഷിയുടെ ഈ പ്രചോദനാത്മക സഹായം പങ്കുവെച്ചത്. തെരുവിൽ പ്ലക്കാർഡുമായി നിന്ന് സൈക്കിൾ യാത്രികർക്ക് റെഡ് ലൈറ്റ് പിടിപ്പിച്ച് നൽകുന്ന ഖുഷിയുടെ വീഡിയോയാണ് ട്വീറ്റിലുള്ളത്. സൈക്കിൾ ഓടിച്ചു വരുന്നവരെ കൈ കാണിച്ച് നിർത്തി ഓരോ സൈക്കിളിന്റെയും മുൻപിലും പിറകിലും ഖുഷി റെഡ് ലൈറ്റുകൾ പിടിപ്പിച്ച് നൽകി. നന്ദി സൂചകമായി പലരും ഖുഷിയുടെ തലയിൽ കൈവച്ച് അനുഗ്രഹിക്കുന്നതും വീഡിയോയിൽ കാണാം. ഓരോ സൈക്കിളും റെഡ് ലൈറ്റുകൾ തെളിച്ച് മുന്നോട്ട് പോകുന്നത് ഏറെ സന്തോഷത്തോടെയാണ് ഖുഷി കണ്ടു നിൽക്കുന്നത്. ഇതിനോടകം ലക്ഷക്കണക്കിനാളുകൾ ഖുഷിയുടെ വീഡിയോ കണ്ടുകഴിഞ്ഞു.
