നെഞ്ചുക്കൾ പെയ്തിടും ഗാനത്തിന്റെ ഗിറ്റാറിസ്റ്റ് സ്റ്റീവ് വാട്‌സ് അന്തരിച്ചു

ചെന്നൈ : പ്രശസ്തനായ തെന്നിന്ത്യൻ ഗിറ്റാറിസ്റ്റ് സ്റ്റീവ് വാട്‌സ് അന്തരിച്ചു. വാരണം ആയിരം എന്ന ചിത്രത്തിലെ നെഞ്ചുക്കുൾ പെയ്തിടും എന്ന ഹിറ്റ് ഗാനത്തിന്റെ ഗിറ്റാറിസ്റ്റ് സ്റ്റീവ് ആയിരുന്നു. ഗാനത്തിന്റെ ചിത്രീകരണ വേളയിൽ ക്ലോസ് അപ്പ് ഷോട്ടുകളിൽ സൂര്യയുടെ കൈകൾക്ക് ഡ്യൂപ്പിട്ടതും സ്റ്റീവ് തന്നെയായിരുന്നു.

ഇളയരാജ, എ ആർ റഹ്മാൻ, ഹാരിസ് ജയരാജ്, യുവൻ ശങ്കർ രാജ, കാർത്തിക് രാജ, ജി.വി പ്രകാശ് ദേവി ശ്രീ പ്രസാദ്, അനിരുദ്ധ്, ഡി ഇമ്മൻ തുടങ്ങി പ്രശസ്തരായ ഒട്ടനവധി സംഗീത സംവിധായകരുടെ പ്രിയപ്പെട്ട ഗിറ്റാറിസ്റ്റായിരുന്നു സ്റ്റീവ്.

രാമസ്വാമിയുടെയും സരോജയുടെയും മകനായി ചെന്നൈയിലാണ് വാട്‌സ് ജനിച്ചു വളർന്നത്. എസ്.ജെ സൂര്യ, ഗൗതം വാസുദേവ് മേനോൻ, അജിത് കുമാർ, സൂര്യ എന്നിവർക്ക് ഗിറ്റാർ അഭ്യസിക്കുന്നതിൽ ഗുരുവായിരുന്നു അദ്ദേഹം. ഭീമ, വാരണം ആയിരം, അദ, തുപ്പാക്കി, നീ താൻ എൻ പൊൻ വസന്തം, പോടാ പോടി, മരിയാൻ വിശ്വരൂപം എന്നിങ്ങനെ നിരവധി സിനിമകളിൽ ഗിറ്റാറിസ്റ്റായി അദ്ദേഹം പ്രവർത്തിച്ചിരുന്നു. 2010-ൽ ഷാജി കൈലാസിന്റെ സംവിധാനത്തിൽ അരങ്ങേറിയ ദ്രോണ 2010 എന്ന ചിത്രത്തിൽ സ്റ്റീവ് ഗാനം ആലപിച്ചിരുന്നു.