നെൽസൺ സംവിധാനം ചെയ്യുന്ന പുതിയ ചിത്രമായ ജയിലറിന്റെ ഷൂട്ടിങ്ങിനായി സൂപ്പർ സ്റ്റാർ രജനീകാന്ത് കേരളത്തിലെത്തി. കഴിഞ്ഞ ദിവസം രാത്രി കൊച്ചി അന്താരാഷ്ട്ര വിമാനത്താവളത്തിൽ എത്തിയ രജനിയുടെ വീഡിയോകളും ചിത്രങ്ങളും സമൂഹമാദ്ധ്യമങ്ങളിൽ ഇതിനോടകം വൈറലായിരുന്നു.
ചിത്രത്തിന്റെ ക്ലൈമാക്സ് രംഗങ്ങൾ ചാലക്കുടിയിലാകും ചിത്രീകരിക്കുക എന്നാണ് പുറത്തു വരുന്ന റിപ്പോർട്ടുകൾ. മുത്തുവേൽ പാണ്ഡ്യൻ എന്ന കഥാപാത്രത്തെയാണ് ചിത്രത്തിൽ രജനികാന്ത് അവതരിപ്പിക്കുന്നത്. രമ്യാ കൃഷ്ണനും ചിത്രത്തിൽ ഒരു പ്രധാന വേഷത്തിൽ എത്തുന്നുണ്ട്. പടയപ്പ എന്ന ചിത്രത്തിന് ശേഷം 23 വർഷങ്ങൾ കഴിഞ്ഞ് രജനികാന്തും രമ്യാ കൃഷ്ണനും ഒന്നിക്കുന്നു എന്ന പ്രത്യേകതയും ചിത്രത്തിനുണ്ട്.
മലയാളികളുടെ അഭിമാനം മോഹൻലാലും ചിത്രത്തിൽ പ്രധാന വേഷത്തിൽ എത്തും. കൂടാതെ മലയാളത്തിൽ നിന്ന് വിനായകനും ചിത്രത്തിൽ ഒരു കേന്ദ്ര കഥാപാത്രമായി എത്തുന്നുണ്ട്. കന്നഡ താരം ശിവരാജ് കുമാറും ചിത്രത്തിൽ പ്രധാന വേഷത്തിൽ എത്തും. പേര് സൂചിപ്പിക്കുന്നത് പോലെ ജയിലറുടെ വേഷത്തിലാണ് രജനീകാന്ത് ചിത്രത്തിൽ എത്തുന്നത്. അനിരുദ്ധ് രവിചന്ദർ ചിത്രത്തിന് സംഗീതം പകരുന്നത്.
