ന്യൂഡൽഹി: വിവിധ ആഘോഷങ്ങൾ വരാനിരിക്കുന്ന സാഹചര്യത്തിൽ ജാഗ്രത കൈവിടരുതെന്ന മുന്നറിയിപ്പുമായി പ്രധാനമന്ത്രി നരേന്ദ്രമോദി. കൊറോണ വീണ്ടും പിടിമുറുക്കുന്ന സാഹചര്യത്തിലാണ് പ്രധാനമന്ത്രി ജാഗ്രത പുറപ്പെടുവിച്ചിരിക്കുന്നത്. ‘ഉത്സാഹത്തോടെ ഉത്സവം ആഘോഷിക്കൂ, എന്നാൽ എപ്പോഴും ജാഗരൂകരായിരിക്കുക’ എന്നാണ് അദ്ദേഹം അഭ്യർത്ഥിച്ചത്. പ്രതിമാസ പരിപാടിയായ മൻ കീ ബാത്തിൽ രാജ്യത്തെ അഭിസംബോധന ചെയ്യവേയാണ് പ്രധാനമന്ത്രി ജാഗ്രതനിർദേശം നൽകിയത്. മൻ കി ബാത്തിന്റെ 99-ാം പതിപ്പിനാണ് രാജ്യം ഇന്ന് സാക്ഷ്യം വഹിച്ചത്.
മൻ കി ബാത്തിൽ രാജ്യത്തിന്റെ പുരോഗതിയിൽ സ്ത്രീകൾക്കുള്ള നിർണായക പങ്ക് സംബന്ധിച്ചും അദ്ദേഹം വ്യക്തമാക്കി. ഏഷ്യയിലെ ആദ്യ വനിതാ ലോക്കോ പൈലറ്റായ സുരോഖ യാദവ്, വ്യോമസേനയിൽ മുന്നണി പോരാളികളുടെ യൂണിറ്റിന്റെ മേധാവി സ്ഥാനത്തെത്തിയ ആദ്യ വനിതാ ഓഫീസർ ഷാലിസ ധാമി എന്നിവരെ അദ്ദേഹം അഭിനന്ദിച്ചു. നാഗാലാൻഡിൽ കഴിഞ്ഞ 75 വർഷത്തിനിടെ ആദ്യമായി രണ്ട് വനിതകൾ നിയമസഭയിലെത്തിയെന്നും അദ്ദേഹം പറഞ്ഞു. ഓസ്‌കർ പുരസ്‌കാര വേദിയിലെ ഇന്ത്യൻ നേട്ടത്തെയും അദ്ദേഹം പരാമർശിച്ചു. ഓസകർ പുരസ്‌കാരം ലഭിച്ച ‘ദ എലിഫന്റ് വിസ്‌പേഴ്‌സ് ‘ എന്ന ഡോക്യുമെന്ററിയുടെ നിർമ്മാതാവ് ഗുണിത് മോംഗയും സംവിധായിക കാർത്തികി ഗോൺസാൽവസും രാജ്യത്തിന് പ്രശംസ നേതി കൊടുത്തതായും അദ്ദേഹം വ്യക്തമാക്കി.
പ്രധാനമന്ത്രിയുടെ പ്രതിമാസ റേഡിയോ പ്രക്ഷേപണ പരിപാടിയാണ് മൻ കി ബാത്ത്. ഏപ്രിൽ 30-ന് പരിപാടിയുടെ നൂറാമത് എപ്പിസോഡ് പ്രക്ഷേപണം ചെയ്യും. ഇതിനോടാനുബന്ധിച്ച് വിവിധ പരിപാടികൾക്കാണ് പദ്ധതിയിട്ടിരിക്കുന്നത്. രാജ്യത്തിന്റെ പരിവർത്തനത്തിൽ മൻ കി ബാത്തിനുള്ള സ്വാധീനം സംബന്ധിച്ച് അവബോധം സൃഷ്ടിക്കാൻ ആകാശവാണി പ്രചരണപരിപാടികൾ ആരംഭിച്ചിട്ടുണ്ട്. രാജ്യത്തെ 42 വിവിധ് ഭാരതി സ്റ്റേഷനുകൾ, 25 എഫ്.എം. റെയിൻബോ ചാനലുകൾ, നാല് എഫ്.എം. ഗോൾഡ് ചാനലുകൾ, 159 പ്രൈമറി ചാനലുകൾ എന്നിവ കാമ്പയിനിന്റെ ഭാഗമാണ്. ‘ന്യൂസ് ഓൺ എയർ’ ആപ്പിലും ഓൾ ഇന്ത്യ റേഡിയോയുടെ യൂട്യൂബ് ചാനലുകളിലും ഇത് ലഭ്യമാകും.
