ഇന്ത്യ ആഹ്ലാദത്തിൽ; മികച്ച പ്രകടനം കാഴ്ചവെച്ച് ലോവ്ലിന ബോർഗോഹെയ്ൻ; അഭിനന്ദനം അറിയിച്ച് പ്രധാനമന്ത്രി

ലോക വനിതാ ബോക്സിംഗിൽ ഇന്ത്യയ്‌ക്കായി നാലാം സ്വർണം കരസ്ഥമാക്കിയ ലോവ്ലിന ബോർഗോഹെയ്നെ അഭിനന്ദിച്ച് പ്രധാനമന്ത്രി നരേന്ദ്ര മോദി. താരം മികച്ച കഴിവ് കാണിച്ചുവെന്നും സ്വർണമെഡൽ വാങ്ങിയതിന്റെ ആഹ്ലാദത്തിലാണ് ഇന്ത്യയെന്നുമാണ് പ്രധാനമന്ത്രി ട്വീറ്റ് ചെയ്തത്.

75 കിലോ വിഭാഗത്തിലാണ് ലോവ്ലിന ബോർഗോഹെയ്ൻ സ്വർണം നേടിയത്. ഫൈനലിൽ ഓസ്ട്രേലിയൻ താരത്തെ തോൽപ്പിച്ചായിരുന്നു വിജയം. 5-2 എന്ന സ്‌കോറിനാണ് സ്വർണം സ്വന്തമാക്കിയത്.

ടോക്കിയോ ഒളിമ്പിക്സിൽ ഇന്ത്യയ്‌ക്കായി വെങ്കല മെഡൽ നേടിയ താരമാണ് ലവ്്ലിന. 2018-ലും 2019-ലും ലോക ചാമ്പ്യൻഷിപ്പ് ഫൈനലിൽ വെങ്കലം നേടാനും താരത്തിനായി. കരിയറിലെ ആദ്യത്തെ ലോക ബോക്സിംഗ് ചാമ്പ്യൻഷിപ്പ് ഫൈനലിൽ വിജയിക്കാൻ സാധിച്ചത് താരത്തിന് മികച്ച നേട്ടമായി.

ഇതോടെ 2023 ലോക ബോക്‌സിങ് ചാമ്പ്യൻഷിപ്പ് നാല് സ്വർണനേട്ടത്തോടെ അവസാനിപ്പിക്കാൻ ഇന്ത്യയ്‌ക്ക് സാധിച്ചു. നീതു ഘൻഘാസ്, സവീറ്റി ബൂറ, നിഖാത് സരിൻ എന്നിവരാണ് നേരത്തേ സ്വർണം നേടിയവർ.