അയോദ്ധ്യ: പുനരുത്ഥാന വിദ്യാപീഠം തയ്യാറാക്കിയ പുസ്തകങ്ങള് ഭഗവാന് ശ്രീരാമന് സമര്പ്പിച്ച് പ്രകാശനം ചെയ്യാൻ തീരുമാനിച്ചതായി അധികൃതർ. ഗുജറാത്തിൽ സ്ഥിതി ചെയ്യുന്ന പുനരുത്ഥാന വിദ്യാപീഠം 1,051 പുസ്തകങ്ങളാണ് ഇതിനോടകം തയ്യാറാക്കിയിരിക്കുന്നത്. നാലര വര്ഷത്തെ ഗവേഷണത്തിന്റെയും പഠനത്തിന്റെയും ഫലമായ ഇവ ഭഗവാന് ശ്രീരാമന് സമര്പ്പിച്ച് പ്രകാശനം ചെയ്യുമെന്ന് വിദ്യാപീഠം വൈസ് ചാന്സലര് ഇന്ദുമതി കത്വാരെ വ്യക്തമാക്കി. അയോദ്ധ്യയിലെ കര്സേവകപുരത്ത് മാദ്ധ്യമങ്ങളെ കാണുകയായിരുന്നു അവർ.
ഏപ്രില് 15ന് നടക്കുന്ന ചടങ്ങിൽ ആര്എസ്എസ് സര്സംഘചാലക് ഡോ. മോഹന് ഭാഗവത് ആണ് പുസ്തകങ്ങള് പ്രകാശനം ചെയ്യുക. ഭഗവാൻ ശ്രീരാമചന്ദ്രന്റെ പ്രസാദമായി രാജ്യത്തെമ്പാടുമുള്ള വിദ്യാഭ്യാസ സ്ഥാപനങ്ങളിലേക്ക് ഈ പുസ്തകങ്ങൾ എത്തണമെന്നാണ് ആഗ്രഹിക്കുന്നതെന്ന് ഇന്ദുമതി കത്വാരെ പ്രതികരിച്ചു. ഭാരതീയ വിജ്ഞാനത്തെ വരും തലമുറകളിലേക്ക് പകരുകയാണ് പുനരുത്ഥാന വിദ്യാപീഠത്തിന്റെ ലക്ഷ്യം. ഇതിന് വേണ്ടി വിദ്യാർത്ഥികൾക്കും അദ്ധ്യാപകർക്കുമായി വ്യത്യസ്തങ്ങളായ സാഹിത്യ സൃഷ്ടികൾ പുനരുത്ഥാന പീഠം തയ്യാറാക്കിയിട്ടുണ്ട്.
വിദ്യാലയങ്ങളിലും സർവകലാശാലകളിലും ഈ പുസ്തകങ്ങൾ ഇടംപിടിക്കണമെന്നാണ് ആഗ്രഹിക്കുന്നതെന്ന് കത്വാര പറഞ്ഞു. ദേശീയ വിദ്യാഭ്യാസ നയത്തിന് കീഴിലുള്ള ഇന്ത്യന് നോളജ് വെല്ത്ത് ഡിപ്പാര്ട്ട്മെന്റുമായി സഹകരിച്ച് ഇതിനുവേണ്ട ശ്രമങ്ങൾ നടത്തുന്നുണ്ടെന്നും അവർ കൂട്ടിച്ചേര്ത്തു.
Comments