ഒരോ ദിവസവും സാമൂഹ്യ മാദ്ധ്യമങ്ങളിൽ പലതരത്തിലുള്ള ഭക്ഷണ വീഡിയോകളാണ് പ്രചരിക്കുന്നത്. ഇതുവരെ കേട്ട് പരിചയം പോലുമില്ലാത്ത ഭക്ഷണങ്ങളുടെ കോമ്പിനേഷനുകളും പരിചയപ്പെടുത്തിക്കൊണ്ടുള്ള വീഡിയോകളും പ്രചരിക്കാറുണ്ട്. ഇത്തരത്തിലുള്ള ഭക്ഷണവീഡിയോ പോസ്റ്റ് ചെയ്യാൻ ഫുഡ് വ്ളോഗർമാർക്കിടയിൽ മത്സരമാണ്. തുടർന്ന് ഇതിനെച്ചൊല്ലി വലിയ ചർച്ചകളും ചൂട്പിടിക്കാറുണ്ട്. അത്തരത്തിലുള്ള പോസ്റ്റാണ് ഇപ്പോൾ ജനശ്രദ്ധ പിടിച്ചുപറ്റിയിരിക്കുന്നത്.
സമൂസയും ബിരിയാണിയും രാജ്യത്തെ ഏറ്റവും പ്രിയപ്പെട്ട ഭക്ഷണ വിഭവങ്ങളാണ്. എളുപ്പത്തിൽ കിട്ടുന്ന പലഹാരമാണ് സമൂസ. രാജ്യത്തിന്റെ മൂലയിലും ലഭ്യമാണ്. അതുപോലെ തന്നെ പ്രിയപ്പെട്ട ഭക്ഷണമാണ് ബിരിയാണി. ഇന്ത്യയുടെ പലയിടങ്ങളിൽ വ്യത്യസ്ത തരത്തിലുള്ള ബിരിയാണികൾ ലഭ്യമാണ്.
സാധാരണഗതിയിൽ ഉരുളക്കിഴങ്ങോ ഇറച്ചിയോ ആണ് സമൂസയ്ക്കുള്ളിൽ നിറയ്ക്കുന്നത്. മറ്റു ചിലർ ഗ്രീൻ പീസ്, കാരറ്റ്, ബീറ്റ്റൂട്ട് തുടങ്ങിയവയും നിറയ്ക്കാറുണ്ട്. മസാലയിലും വ്യത്യസ്തത കൊണ്ടുവരുന്ന പരീക്ഷണങ്ങളും സമൂസയ്ക്കുള്ളിൽ നടക്കാറുണ്ട്. എന്നാൽ ഇപ്പോൾ വളരെ വ്യത്യസ്തമായി സമൂസയുടെ ഉള്ളിൽ നിറച്ചിരിക്കുന്നത് ബിരിയാണിയാണ്.
ട്വിറ്ററിലൂടെയാണ് ആദ്യം സമൂസ ബിരിയാണിയുടെ ചിത്രങ്ങൾ പ്രചരിച്ചത്. ചിത്രങ്ങൾ വൈറലായതോടെ നിരവധി പേരാണ് ഇതെക്കുറിച്ചുള്ള അനുഭവങ്ങൾ പങ്കുവെക്കാൻ എത്തിയത്. ബിരിയാണി സമൂസ രുചിച്ചുനോക്കാൻ താത്പര്യം കാണിച്ചെത്തുന്നവരും നിരവധിയാണ്. ബിരിയാണിയും സമൂസയും ഒരുപോലെ ഇഷ്ടം. അങ്ങനെയെങ്കിൽ ഇവയുടെ കോംബോ ഒന്ന് പരീക്ഷിക്കാമെന്നും അഭിപ്രായമുണ്ട്.
എന്നാൽ ബിരിയാണിയും സമൂസയും ചേർന്ന ഈ കോംബോ അത്രപോരാ എന്ന അഭിപ്രായമുള്ളവരാണ് വേറെ ചിലർ. ഏതായാലും ബിരിയാണി സമൂസ സമൂഹമാദ്ധ്യമങ്ങളിൽ ഹിറ്റാവുകയാണ്.
