എറണാകുളം: മാനനഷ്ടക്കേസിൽ നഷ്ടപരിഹാരം ആവശ്യപ്പെട്ട് സിപിഎം സംസ്ഥാന സെക്രട്ടറി എംവി ഗോവിന്ദൻ നൽകിയ വക്കീൽ നോട്ടീസിന് മറുപടിയുമായി സ്വപ്ന സുരേഷ്. ചില്ലിക്കാശ് പോലും നഷ്ടപരിഹാരം നൽകില്ലെന്നും മാപ്പ് പറയില്ലെന്നുമാണ് സ്വർണക്കടത്ത് കേസ് പ്രതി സ്വപ്ന അറിയിച്ചത്.
‘മാനനഷ്ടക്കേസുമായി ബന്ധപ്പെട്ട് എന്ത് നിയമനടപടികളും നേരിടാൻ തയ്യാറാണ്. ഫേസ്ബുക്ക് ലൈവിൽ എല്ലാ വിവരങ്ങളും വളരെ വ്യക്തമായി മലയാളത്തിൽ തന്നെ പറയുന്നുണ്ട്. പറഞ്ഞ കാര്യങ്ങൾ വീണ്ടും കേൾക്കണം. വിജയ് പിള്ള പറഞ്ഞ കാര്യങ്ങൾ മാത്രമാണ് വെളിപ്പെടുത്തിയത്. എംവി ഗോവിന്ദനാണ് വിജയ് പിള്ളയെ അയച്ചതെന്ന് ഒരിടത്തും പറയുന്നില്ല. വിജയ് പിള്ള വഴി എംവി ഗോവിന്ദൻ ബന്ധപ്പെട്ടുവെന്നും പറയുന്നില്ല. വാഗ്ദാനങ്ങൾ നിരസിച്ചാൽ പ്രത്യഘാതം നേരിടേണ്ടി വരുമെന്ന് ഗോവിന്ദൻ പറഞ്ഞുവെന്ന് വിജയ് പിള്ള പറഞ്ഞതായാണ് ആരോപണം ഉന്നയിച്ചിരിക്കുന്നതെന്ന് വ്യക്തമായി മനസിലാക്കാതൈയാണ് ആരോപണം ഉന്നയിച്ചിരിക്കുന്നത്. എംവി ഗോവിന്ദന്റെ ദൂതനായാണ് വിജയ് പിള്ള വന്നതെന്ന് എവിടെയും പറയുന്നില്ല’.
വിജയ് പിള്ളയുമായി ഗോവിന്ദനോ കുടുംബത്തിനോ ബന്ധമുണ്ടെന്നും പറഞ്ഞിട്ടില്ല. ഒരു കോടി രൂപയുടെ പത്ത് ശതമാനം കോടതി ഫീസായി അടച്ച് കേസ് ഫയൽ ചെയ്യുന്നതിനായി കാത്തിരിക്കുകയാണ്- സമൂഹമാദ്ധ്യമത്തിലൂടെ സ്വപ്ന വ്യക്തമാക്കി. സ്വപ്നയുടെ അഭിഭാഷകൻ ആർ.കൃഷ്ണരാജ് ആണ് വിശദമായ മറുപടിക്കത്ത് തയ്യാറാക്കിയത്. ഫേസ്ബുക്ക് വഴിയാണ് സ്വപ്ന കത്ത് പുറത്തുവിട്ടത്.
