ഭോപ്പാൽ : ദേശീയ സുരക്ഷാ ഉപദേശകൻ അജിത് ഡോവലിന്റെ ക്ഷേത്രദർശനത്തിന് പിന്നാലെ പ്രദേശത്ത് ഡ്രോൺ സാന്നിദ്ധ്യം കണ്ടെത്തിയിരുന്നു. ഇക്കഴിഞ്ഞ ശനിയാഴ്ച രാത്രിയാണ് മദ്ധ്യപ്രദേശിലെ ഉജ്ജയിനിലെ മഹാകാലേശ്വർ ക്ഷേത്രത്തിൽ അജിത് ഡോവൽ എത്തിയത്. ഒൻപത് മണിയോടെ ഡോവൽ മടങ്ങിയതിന് ശേഷം രാത്രി 10.30നാണ് ഡ്രോൺ കണ്ടെത്തിയത്.
ഇതോടെ പോലീസ് അന്വേഷണത്തിൽ ഡ്രോൺ പറത്തിയ വ്യക്തിയെ അറസ്റ്റ് ചെയ്തു. നേരത്തെ തന്നെ മഹാകലേശ്വർ ക്ഷേത്രം ഉൾപ്പെടുന്ന മേഖലയിൽ അനുമതിയില്ലാതെ ഡ്രോൺ പറത്തുന്നതിന് വിലക്കുണ്ടായിരുന്നു. അതിനാലാണ് യുവാവിനെതിരെ പൊലീസ് കേസ് രജിസ്റ്റർ ചെയ്തത്. ഇയാൾ പറത്തിയ ഡ്രോണും പിടിച്ചെടുത്തിട്ടുണ്ട്. ക്ഷേത്രത്തിന് സമീപം ഡ്രോൺ പറത്തിയതിന് യുപി സ്വദേശിയായ മുപ്പതുകാരനാണ് പിടിയിലായത്.
രാത്രിയിൽ ക്ഷേത്രത്തിൽ നിന്നും മടങ്ങിയ ഭീഷണി വകവയ്ക്കാതെ ഡോവൽ അടുത്ത ദിവസം രാവിലെയും ക്ഷേത്രത്തിൽ ദർശനത്തിന് എത്തിയിരുന്നു. ഭോപ്പാലിൽ നടന്ന സംയുക്ത കമാൻഡേഴ്സ് കോൺഫറൻസിൽ പങ്കെടുത്ത ശേഷമാണ് ഡോവൽ വീണ്ടും ക്ഷേത്രദർശനത്തിന് എത്തിയത്.
