നീണ്ട ഇടവേളയ്ക്ക് ശേഷം ബോളിവുഡിൽ അപൂര്വ്വം സാമ്പത്തിക വിജയങ്ങളില് ഒന്നായിരുന്നു ബ്രഹ്മാസ്ത്ര പാര്ട്ട് 1 ശിവ. അയന് മുഖര്ജി സംവിധാനം ചെയ്ത ചിത്രത്തിന് വൻ വിജയമായിരുന്നു. മൂന്ന് ഭാഗങ്ങളിലായി പുറത്തിറങ്ങുന്ന സിനിമയുടെ രണ്ടും മൂന്നും ഭാഗങ്ങളാണ് ഇനി വരാനിരിക്കുന്നത്. ചിത്രത്തിന്റെ റിലീസും പ്രഖ്യാപിച്ചിരിക്കുകയാണ് സംവിധായകൻ.
ഇന്ത്യന് പുരാണങ്ങളുമായി ബന്ധപ്പെട്ട് സംവിധായകന് അയന് മുഖര്ജി രൂപപ്പെടുത്തിയ ഏറെ സവിശേഷതകളുള്ള ഒരു ഫ്രാഞ്ചൈസിയിലെ ആദ്യ ഭാഗമായിരുന്നു ഈ ചിത്രം. ആദ്യ ഭാഗത്തേക്കാള് വലിയ കാന്വാസിലാവും തുടര് ഭാഗങ്ങള് വരികയെന്നും രണ്ട് ഭാഗങ്ങളുടെയും ചിത്രീകരണം ഒരുമിച്ചാവും നടക്കുകയെന്നും അയന് മുഖര്ജി അറിയിച്ചു.
ആദ്യ ഭാഗത്തിന് പ്രേക്ഷകര് നല്കിയ പിന്തുണയില് നിന്നാണ് 2, 3 ഭാഗങ്ങള് കൂടുതല് പകിട്ടോടെ എത്തിക്കാനുള്ള ഊര്ജ്ജം ലഭിച്ചതെന്ന് പറയുന്ന അയന് മുഖര്ജി ഈ ഭാഗങ്ങളുടെ റിലീസ് എപ്പോഴെന്നും പ്രഖ്യാപിച്ചിരിക്കുകയാണ്. ബ്രഹ്മാസ്ത്ര ട്രിലജിയുടെ ആദ്യ ഭാഗത്തിന്റെ പേര് ശിവ എന്നായിരുന്നെങ്കില് രണ്ടാം ഭാഗത്തിന്റെ പേര് ദേവ് എന്നാണ്. ഈ ഭാഗം 2026 ഡിസംബറിലും മൂന്നാം ഭാഗം 2027 ഡിസംബറിലും തിയറ്ററുകളില് എത്തും.
2022 സെപ്റ്റംബർ 9 നാണ് ചിത്രത്തിന്റെ ആദ്യ ഭാഗം റിലീസിനെത്തിയത്. ഏകദേശം 450 കോടിയോളം ബോക്സ് ഓഫീസിൽ ചിത്രം നേടുകയും ചെയ്തു. രൺബീറും ആലിയ ഭട്ടും കേന്ദ്ര കഥാപാത്രങ്ങളായി എത്തിയ ചിത്രത്തിൽ അമിതാഭ് ബച്ചൻ, നാഗാർജുന, ഷാരൂഖ് ഖാൻ, മൗനി റോയി തുടങ്ങിയ വൻതാരനിരയാണ് അണിനിരന്നിരുന്നത്. രണ്ടാം ഭാഗത്തിൽ ദീപിക പദുകോണും രൺവീർ സിങ്ങും ഉണ്ടാകുമെന്നാണ് റിപ്പോർട്ട്. രൺബീറിന്റെ കഥാപാത്രമായ ശിവയുടെ പിതാവ് ദേവിന്റെ കഥയാണ് രണ്ടാംഭാഗത്തിൽ പറയുന്നത്.
