ലോകത്തിലെ ഏറ്റവും വിലപിടിപ്പുള്ള ദ്രാവകം എന്താണെന്ന് നിങ്ങൾക്കറിയാമോ? തേളിന്റെ വിഷമാണത്. ഒരാളെ കൊല്ലാനുള്ള കഴിവ് എന്നതിനേക്കാളുപരി ഒട്ടേറ പ്രത്യേകതകൾ ഉള്ളതുകൊണ്ടാണ് തേളിന്റെ വിഷം ഇത്രമാത്രം വിലമതിക്കുന്നത്. ഒരു ഗാലൺ തേൾ വിഷത്തിന് 39 ദശലക്ഷം ഡോളറാണ് വിലയെന്ന് ബ്രിട്ടാണിക്ക.കോം റിപ്പോർട്ട് ചെയ്യുന്നു. ഡെത്ത്സ്റ്റാൽക്കർ എന്നയിനം തേളിന്റെ വിഷത്തിന്റെ വിലയാണിത്. ലോകത്തിലെ ഏറ്റവും അപകടകാരിയായ തേളാണിതെന്നാണ് പഠനങ്ങൾ.
ഈ തേളിന്റെ വിഷം ഒരു ഗാലൺ നിറയണമെങ്കിൽ 2.64 ദശലക്ഷം തവണ അവ വിഷം പുറപ്പെടുവിക്കണമന്നാണ് കണക്ക്. നിരവധി മെഡിക്കൽ ആവശ്യങ്ങൾക്ക് ഈ വിഷം ഉപയോഗപ്രദമാണെന്നും വിദഗ്ധർ പറയുന്നു. അതിമാരകമായ അർബുദങ്ങൾ മുതൽ മലേറിയ ചികിത്സിക്കുന്നതിന് വരെ തേൾ വിഷം ഉപയോഗിക്കാമെന്നാണ് ശാസ്ത്രലോകത്തിന്റെ കണ്ടെത്തൽ.
ഇതുപോലെ ഗാലൺ കണക്കിന് വിറ്റഴിക്കുന്ന, ഏത് മാർക്കറ്റിലും കിട്ടുന്ന സാധനമല്ല ഈ തേളിന്റെ വിഷം. ഡ്രോപ്പുകളായാണ് ഇത് വിൽപന നടത്തുക. പഞ്ചസാര തരിയുടെ അത്രേം മാത്രം വിഷമെടുത്താൽ അതിനുവരും 130 ഡോളർ. ഇത്രയും ഉയർന്ന വിലയീടാക്കാൻ കാരണവുമുണ്ട്. ഒരു തേളിൽ നിന്നും ഒറ്റത്തവണ പുറപ്പെടുവിക്കുന്ന വിഷത്തിന്റെ അളവ് വളരെ കുറവാണ് എന്നത് തന്നെയാണ് കാരണം. വെറും രണ്ട് മില്ലിഗ്രാം വിഷം മാത്രമാണ് തേളിൽ നിന്ന് ഒരു പ്രാവശ്യം ലഭിക്കുക.
നോർത്ത് ആഫ്രിക്ക മുതൽ മിഡിൽ ഈസ്റ്റ് വരെയുള്ള മേഖലകളിലാണ് ഡെത്ത് സ്റ്റാൽക്കർ തേൾ അധിവസിക്കുന്നത്. മരുഭൂമികളാണ് ഇവയുടെ പ്രിയങ്കരമായ ഇടങ്ങൾ. അതീവ അപകടകാരിയാണെങ്കിലും ഈ തേൾ കുത്തിയാൽ ആരോഗ്യവാനായ മനുഷ്യൻ അത്ര പെട്ടെന്ന് മരിക്കുകയില്ല. അസഹനീയമായ വേദനയുണ്ടാകുമെങ്കിലും അതിജീവിക്കാൻ കഴിയുമെന്നാണ് ഡോക്ടർമാർ പറയുന്നത്.
