ന്യൂഡൽഹി: പ്രതിരോധ വ്യവസായ മേഖലയെ ശക്തിപ്പെടുത്തുന്നതിനായി എഎച്ച്എസ്പിയുമായി ബന്ധപ്പെട്ട പരിഷ്കാരങ്ങൾക്ക് അംഗീകാരം നൽകി പ്രതിരോധ മന്ത്രാലയം. പ്രതിരോധ മേഖലയിൽ കാലോചിതമായ മാറ്റങ്ങൾ കൊണ്ടുവരുന്നതിന്റെ ഭാഗമായാണ് പുതിയ പരിഷ്കാരങ്ങൾ. ഇതിലൂടെ പ്രതിരോധമേഖലയിലെ ഉപകരണങ്ങളുടെ നിർമ്മാണവും ഗുണനിലവാര നിർണയവും കൂടുതൽ സുതാര്യമാക്കാനാണ് കേന്ദ്ര സർക്കാർ ലക്ഷ്യമിടുന്നത്.
നിലവിലുള്ള സംവിധാനങ്ങൾ വ്യവസായ മേഖലയ്ക്ക് കാര്യക്ഷമമായി പ്രവർത്തിക്കാൻ തടസം സൃഷ്ടിക്കുന്നതായി കണ്ടെത്തിയതിനെ തുടർന്നാണ് പുതിയ നടപടികൾ. നിലവിലുള്ള പ്രതിരോധ പൊതുമേഖലാ സ്ഥാപനങ്ങളിലെയും സ്വകാര്യ മേഖല സ്ഥപനങ്ങളിലെയും ഉത്പന്നങ്ങളുടെ എഎച്ച്എസ്പി ഡയറക്ടറേറ്റ് ജനറൽ ഓഫ് ക്വാളിറ്റി അസ്സുഷറൻസ് ( ഡിജിക്യൂഎ) ആണ്.
എഎച്ച്എസ്പി മാനദണ്ഡങ്ങൾ ലഘൂകരിക്കുന്നത് പ്രതിരോധ വ്യവസായ മേഖലയ്ക്ക് ഗുണം ചെയ്യുമെന്നാണ് കരുതപ്പെടുന്നത്. ഇതുമായി ബന്ധപ്പെട്ട് അതിവേഗം നടപടി സ്വീകരിക്കാനാണ് പ്രതിരോധ മന്ത്രാലയം ഡിജിക്യൂഎയ്ക്ക് നൽകിയിരിക്കുന്ന നിർദ്ദേശം.
