കൊച്ചി: അന്ത്യകർമങ്ങൾ ചെയ്ത് അച്ഛനെ യാത്രയാക്കി ഗായികമാരായ അമൃതയും അഭിരാമിയും. അന്തരിച്ച ഓടക്കുഴൽ കലാകാരനും ഗായിക അമൃത സുരേഷിന്റെ അച്ഛനുമായ പി.ആർ. സുരേഷിന്റെ സംസ്കാരം നടത്തി. പച്ചാളം സ്മശാനത്തിലായിരുന്നു ചടങ്ങുകൾ നടന്നത്. സുരേഷിന്റെ പ്രിയപ്പെട്ട ഓടക്കുഴൽ സമീപത്ത് വെച്ചാണ് അമൃതയും സഹോദരി അഭിരാമിയും ചേർന്ന് അന്ത്യകർമങ്ങൾ ചെയ്തത്. മൃതദേഹം പൊതുദർശനത്തിന് വെച്ചപ്പോൾ നിരവധി പേരാണ് അന്ത്യാഞ്ജലി അർപ്പിക്കാനായി എത്തിയത്.
സ്ട്രോക്കിനെ തുടർന്ന് കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് സുരേഷ് മരണപ്പെട്ടത്. പിതാവിന്റെ മരണ വിവരം അമൃത സുരേഷ് തന്നെയാണ് സാമൂഹ്യമാദ്ധ്യമത്തിലൂടെ അറിയിച്ചത്. ‘ഞങ്ങടെ പൊന്നച്ചൻ ഇനി ഭഗവാന്റെ കൂടെ’ എന്ന അടികുറിപ്പോടെയാണ് പിതാവിനൊപ്പമുള്ള ചിത്രം അമൃത പങ്കുവെച്ചത്.
