സോൾ: കൊറിയൻ പോപ് താരം മൂൺബിനെ മരിച്ച നിലയിൽ കണ്ടെത്തി. ആസ്‌ട്രോ എന്ന കെ-പോപ് ബാൻഡിലെ അംഗമായിരുന്നു മൂൺബിൻ. കഴിഞ്ഞ ദിവസം രാത്രി 8 മണിയ്‌ക്ക് ശേഷം സോളിലെ ഗൻഗ്നം ജില്ലയിലെ വീട്ടിൽ മൂൺബിനെ ബോധരഹിതനായി കണ്ടെത്തുകയായിരുന്നു.
മാനേജറാണ് മൂൺബിനെ അവശനിലയിൽ കണ്ടെത്തിയത്. പിന്നാലെ പോലീസിനെ വിവരമറിയിക്കുകയായിരുന്നു. മരണകാരണം എന്തെന്ന് ഇതുവരെ വ്യക്തമല്ല. മൃതദേഹം പോസ്റ്റ്്‌മോർട്ടത്തിനായി ആശുപത്രിയിലേക്ക് മാറ്റി. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. ഗായകന്റെ മരണത്തിൽ സംഗീതലോകവും സുഹൃത്തുക്കളും ആരാധകരും അനുശോചനം രേഖപ്പെടുത്തി.
2016 ഫെബ്രുവരി 23-നാണ് മൂൺബിൻ കലാരംഗത്ത് എത്തുന്നത്. പ്രശസ്ത കെ-ഡ്രാമയായ ‘ബോയ്‌സ് ഓവർ ഫ്‌ളവേഴ്‌സിൽ’ കിം ബുമ്മിന്റെ കഥാപാത്രത്തിന്റെ ബാല്യകാലം അവതരിപ്പിച്ചത് മൂൺബിൻ ആയിരുന്നു. ഇതിന് ശേഷമാണ് ആസ്‌ട്രോ ബാൻഡിൽ അംഗമാകുന്നത്.
