മുംബൈ : ഗായികയും പ്രശസ്ത നിർമ്മാതാവ് യാഷ് ചോപ്രയുടെ ഭാര്യയുമായ പമേല ചോപ്ര അന്തരിച്ചു. മുംബൈ ലീലാവതി ആശുപത്രിയിൽ വാർദ്ധക്യ സഹജമായ രോഗങ്ങളെ തുടർന്ന് ചികിത്സയിലിരിക്കെയായിരുന്നു അന്ത്യം. പിന്നണി ഗായിക, തിരക്കഥാകൃത്ത്, ചലച്ചിത്ര നിർമ്മാതാവ് എന്നീ മേഖലകളിൽ പമേല സംഭാവന നൽകിയിട്ടുണ്ട്. ചലച്ചിത്ര രംഗത്തെ ഒട്ടനവധി പേർ പമേല ചോപ്രയ്‌ക്ക് ആദരാഞ്ജലി നേർന്നു.
ഇന്ത്യൻ ആർമിയിലെ ഉദ്യോഗസ്ഥനായിരുന്ന മൊഹീന്ദർ സിംഗിന്റെ മകളായി 1938-ലാണ് ജനനം. അച്ഛന്റെ ജോലിയുടെ ഭാഗമായി ഇന്ത്യയിലെ വിവിധ നഗരങ്ങളിലായാണ് പമേല വളർന്നത്. ചെറുപ്പം മുതൽ ഭരതനാട്യം അഭ്യസിച്ചിരുന്നെങ്കിലും ഒരിക്കൽ പോലും പൊതുവേദിയിൽ നൃത്തം ചെയ്തിരുന്നില്ല. 1970-ലാണ് യാഷ് ചോപ്രയുമായുള്ള വിവാഹം. ഈ വർഷം തന്നെയാണ് യാഷ് ചോപ്ര യാഷ് രാജ് ഫിലിംസ് എന്ന നിർമാണ കമ്പനിയ്‌ക്ക് തുടക്കമിട്ടതും.
വിവാഹ ശേഷമാണ് പമേല ചോപ്ര കലാരംഗത്ത് സജീവമാകുന്നത്. 1976-ൽ യാഷ് ചോപ്ര സംവിധാനം ചെയ്ത അമിതാഭ് ബച്ചൻ, ശശികപൂർ എന്നിവർ ഗംഭീര പ്രകടനം കാഴ്ചവെച്ച കഭീ കഭീ ചിത്രത്തിന്റെ തിരക്കഥ രചിച്ചതും പമേലയായിരുന്നു. ചിത്രത്തിലെ തന്നെ രണ്ട് ഗാനങ്ങൾ ആരംഭിച്ചതും പമേലയായിരുന്നു. ദുസ്‌ര ആദ്മി, തൃശൂൽ, സിൽസിലാ, ബാസാർ, ഡർ, ദിൽവാലേ ദുൽഹനിയ ലേ ജായേഗേ തുടങ്ങി നിരവധി ചിത്രങ്ങളിലും ഗാനം ആലപിച്ചു. 2012-ലായിരുന്നു യാഷ് ചോപ്രയുടെ വിയോഗം. നിർമാതാക്കളായ ആദിത്യ ചോപ്ര, ഉദയ് ചോപ്ര, എന്നിവരാണ് മക്കൾ. നടി റാണി മുഖർജി മരുമകളാണ്.
