ന്യൂഡൽഹി: കേന്ദ്ര പ്രതിരോധ മന്ത്രി രാജ്‌നാഥ് സിംഗിന് കൊറോണ സ്ഥിരീകരിച്ചു. അദ്ദേഹം തന്റെ ഔദ്യോഗിക ട്വിറ്ററിലൂടെയാണ് വിവരം പങ്കുവെച്ചത്. താനുമായി സമ്പർക്കം പുലർത്തിയവർ ക്വാറന്റൈനിൽ ഇരിക്കണമെന്ന് അദ്ദേഹം അഭ്യർത്ഥന നടത്തി. നിലവിൽ അദ്ദേഹം ഹോം ക്വാറന്റൈനിലാണ്.
രോഗത്തിന്റെ നേരിയ ലക്ഷണങ്ങൾ മാത്രമാണ് അദ്ദേഹത്തിന് ഉള്ളതെന്നാണ് നിലവിൽ ലഭിക്കുന്ന വിവരം. ഡോക്ടർമാരുടെ ഒരു സംഘം എത്തി പരിശോധന നടത്തിയെന്നും വിശ്രമം നിർദേശിച്ചുവെന്നും ഔദ്യോഗിക വൃത്തങ്ങൾ അറിയിച്ചു.വ്യാഴായ്ച ന്യൂഡൽഹിയിൽ വെച്ച് നടക്കുന്ന ഇന്ത്യൻ എയർഫോഴ്‌സ് കമാൻഡേഴ്‌സ് കോൺഫറൻസിൽ അദ്ദേഹം പങ്കെടുക്കേണ്ടതായിരുന്നെങ്കിലും രോഗ ലക്ഷണങ്ങളെ തുടർന്ന് ഒഴിവായതായി അധികൃതർ അറിയിച്ചു.
അടുത്തിടെ കേന്ദ്രമന്ത്രി ജ്യോതിരാദിത്യ സിന്ധ്യയ്‌ക്കും കൊറോണ സ്ഥിരീകരിച്ചിരുന്നു. താനുമായി സമ്പർക്കത്തിലേർപ്പെട്ടവർ മുൻകരുതലുകൾ സ്വീകരിക്കണമെന്നും പരിശോധന നടത്തണമെന്നും അദ്ദേഹം ട്വിറ്ററിലൂടെ അഭ്യർത്ഥന നടത്തിയിരുന്നു.
