2023ലെ വേൾഡ് ട്രാൻസ്പ്ലാന്റ് ഗെയിംസിൽ മലയാളി താരമായ വരുൺ ആനന്ദിന്റെ പ്രകടനമാണ് ഇപ്പോൾ ചർച്ചയാകുന്നത്. മൂന്ന് സ്വർണ മെഡലുകൾ ഇന്ത്യയ്ക്ക് വേണ്ടി കരസ്ഥമാക്കിയ 13-കാരനാണ് വരുൺ. അവയവങ്ങൾ ദാനം ചെയ്തവർക്കും സ്വീകരിച്ചവർക്കും വേണ്ടി നടത്തുന്ന വേൾഡ് ട്രാൻസ്പ്ലാന്റ് ഗെയിംസ് ഇത്തവണ ഓസ്ട്രേലിയയിലെ പെർത്തിൽ അരങ്ങേറിയപ്പോൾ വരുണിലൂടെ രാജ്യം ചരിത്രം സൃഷ്ടിക്കുകയായിരുന്നു.
ഗെയിംസിന് വേണ്ടി ഇന്ത്യയിൽ നിന്ന് പങ്കെടുത്ത ഏറ്റവും പ്രായം കുറഞ്ഞ മത്സരാർത്ഥിയായിരുന്നു വരുൺ ആനന്ദ്. ഗുരുതരമായ കിഡ്നി ഡിസീസിനെ തുടർന്ന് 9-ാം വയസിൽ വൃക്ക മാറ്റിവച്ച ഈ 13-കാരൻ ബാഡ്മിന്റൺ, ടെന്നീസ്, ടേബിൾ ടെന്നീസ് എന്നിവയിൽ അത്യുജ്ജല പ്രകടനം കാഴ്ചവച്ച് സ്വർണം നേടി ജേതാവായി. വരുണിന് വൃക്ക നൽകിയ അമ്മ ദീപയും മത്സരത്തിൽ മാറ്റുരച്ചിരുന്നു. ബോൾ ത്രോയിൽ വെങ്കല മെഡൽ സ്വന്തമാക്കിയ ദീപ, അവയവ ദാതാക്കളുടെ വിഭാഗത്തിലായിരുന്നു പങ്കെടുത്തത്.
Comments