വയനാട്: വയനാട് കൽപ്പറ്റയിൽ കാർ നിയന്ത്രണം വിട്ട് താഴ്ചയിലേക്ക് മറിഞ്ഞ് മൂന്ന് വിദ്യാർത്ഥികൾ മരിച്ചു. കാറിലുണ്ടായിരുന്ന മറ്റുള്ളവർക്ക് പരിക്കേറ്റിട്ടുണ്ട്. അങ്ങാടിക്കടവ് ഡോൺ ബോസ്കോ കോളജിലെ അവസാന വർഷ ബിരുദ വിദ്യാർഥികളാണ് മരിച്ചത്. കണ്ണീർ ഇരട്ടി സ്വദേശികളായ ജിസ്ന മേരി ജോസഫ് (20), അഡോൺ ബെസ്റ്റി (20), കാസർകോട് വെള്ളരിക്കുണ്ട് സ്വദേശി സ്നേഹ ജോസ് (20) എന്നിവരാണ് മരിച്ചതെന്ന് പോലീസ് അറയിച്ചു.
മലയാറ്റൂർ സന്ദർശനം കഴിഞ്ഞു നാട്ടിലേക്കു മടങ്ങുകയായിരുന്ന സംഘമാണ് അപകടത്തിൽപ്പെട്ടത്. ഇന്ന് വൈകിട്ട് ആറോടെയാണ് അപകടം. പഴമുടി ജംഗ്ഷന് സമീപത്തെ വളവിലെ വൈദ്യുതിത്തൂണിൽ കാർ ഇടിക്കുകയും റോഡിന്റെ മതിൽക്കെട്ടിനു 2 മീറ്ററോളം താഴേക്കു തലകീഴായി പതിക്കുകയുമായിരുന്നു.
കാറിലുണ്ടായിരുന്ന അഡോണിന്റെ സഹോദരി ഡിയോണ ബെസ്റ്റി, സ്നേഹയുടെ സഹോദരി സോന ജോസഫ് കണ്ണൂർ പൂളക്കുറ്റി സ്വദേശി സാൻജോ ജോസ് അഗസ്റ്റിൻ എന്നിവരെ പരുക്കുകളോടെ ആശുപത്രിയിൽ പ്രവേശിപ്പിച്ചിട്ടുണ്ട്.
Comments