തമിഴിൽ ഉഗ്രൻ കഥാപാത്രങ്ങൾ ചെയ്ത് പ്രേക്ഷകരെ കൈയിലെടുത്ത നടനാണ് ശിവ കാർത്തികേയൻ. ഇപ്പോഴിതാ ‘അയലാൻ’എന്ന സയൻസ് ഫിക്ഷൻ ചിത്രത്തിന്റെ വിശേഷങ്ങളാണ് പുറത്ത് വരുന്നത്. ശിവകാർത്തികേയൻ ആരാധകർ ആകാംഷയോടെ കാത്തിരിക്കുന്ന ചിത്രമാണ് അയലാൻ. പ്രേക്ഷകരുടെ കാത്തിരിപ്പിന് വിരാമമിട്ട് അയലാൻ തിയറ്ററുകളിലെത്താൻ പോകുകയാണ്. ദീപാവലിയ്‌ക്ക് റിലീസ് ചെയ്യുമെന്നാണ് ചിത്രത്തിന്റെ പോസ്റ്ററിനൊപ്പം ശിവകാർത്തികേയൻ തന്നെ തന്റെ ട്വിറ്ററിൽ പോസ്റ്റ് ചെയ്തിരിക്കുന്നത്.
ആർ രവികുമാറിന്റെ സംവിധാനത്തിലാണ് അയലാൻ ഒരുങ്ങുന്നത്. സയൻസ് ഫിക്ഷനും പുതിയ സാങ്കേതികതകളും ഉൾപ്പെട്ടതാണ് അയലാൻ ചിത്രം. രാകുൽ പ്രീത് സിംഗ്, ശരദ് കേൽക്കർ, ഇഷ കോപ്പിക്കർ എന്നിവരാണ് മറ്റ് പ്രധാന കഥാപാത്രങ്ങളിൽ എത്തുന്നത്. ചിത്രത്തിന്റെ സംഗീതം എ ആർ റഹ്‌മാനും ഛായാഗ്രഹണം നീരവ് ഷായുമാണ് നിർവ്വഹിച്ചിരിക്കുന്നത്.
മഡോണി അശ്വിന്റെ സംവിധാനത്തിലൊരുങ്ങിയ ശിവകാർത്തികേയന്റെ ഏറ്റവും പുതിയ ചിത്രം’മാവീരൻ’ആഗസ്റ്റ് 11-ന് റിലീസ് ചെയ്യും. ശിവകാർത്തികേയന്റെ നായക വേഷത്തിൽ അവസാനമായി തിയറ്ററുകളിലെത്തിയ ചിത്രമാണ് പ്രിൻസ്. അനുദീപ് കെ വി ആണ് ചിത്രത്തിന്റെ സംവിധാനം.
