യുവ താരനിരകൾ അണി നിരക്കു പുത്തൻ ചിത്രം’താനാരാ’യുടെ ഫസ്റ്റ് ലുക്ക് പോസ്റ്റർ പുറത്തിറങ്ങി. റാഫിയുടെ തിരക്കഥയിൽ
ഹരിദാസ് സംവിധാനം ചെയ്യുന്ന ചിത്രമാണ് ‘താനാരാ’. വിഷ്ണു ഉണ്ണികൃഷ്ണൻ, ഷൈൻ ടോം ചാക്കോ, അജു വർഗീസ് എന്നിവരാണ് ചിത്രത്തിൽ കേന്ദ്ര കഥാപാത്രങ്ങളായി എത്തുന്നത്. ജിബു ജേക്കബ്, ദീപ്തി സതി, ചിന്നു ചാന്ദിനി, സ്‌നേഹ ബാബു എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങൾ.
പൂർണമായും കോമഡി പശ്ചാത്തലത്തിലാണ് ചിത്രമൊരുങ്ങുന്നത്. സൂത്രശാലിയായ ഒരു മോഷ്ടാവ് യുവ രാഷ്‌ട്രീയക്കാരന്റെ ജീവിതത്തിൽ വരുത്തിവെയ്‌ക്കുന്ന രസകരമായ സംഭവങ്ങളാണ് ചിത്രം. അത്യന്തം തമാശകൾ നിറഞ്ഞ ചലചിത്രാവിഷ്‌കാരമാണ് താനാരയ്‌ക്കുള്ളത്. കട്ടപ്പനയിലെ ഹൃതിക് റോഷനിലൂടെ ശ്രദ്ധേയനായ യുവനടൻ വിഷ്ണു ഉണ്ണികൃഷ്ണനാണ് മോഷ്ടാവായി എത്തുന്നത്. യുവ രാഷ്‌ട്രീയക്കാരനായി ഷൈൻ ടോം ചാക്കോയും അവതരിപ്പിക്കുന്നു.
ഒരു പിടി മികച്ച സിനിമകളിലൂടെ ശ്രദ്ധേയനായ സംവിധായകൻ ഹരിദാസ് ഒരു ഇടവേളയ്‌ക്ക് ശേഷമാണ് താനാരാ ചിത്രത്തിലൂടെ രംഗത്തെത്തുന്നത്. ദിലീപ് നായകനാകുന്ന വോയിസ് ഓഫ് സത്യനാഥൻ എന്ന ചിത്രത്തിന് ശേഷം റാഫി തിരക്കഥ എഴുതുന്ന ചിത്രമാണിത്. വൺ ഡേ ഫിലിംസിന്റെ ബാനറിൽ ബിജു വി മത്തായിയാണ് ചിത്രത്തിന്റെ നിർമാണം. ബി കെ ഹരിനാരായണൻ, വിനായക് ശശികുമാർ എന്നിവരുടെ വരികൾക്ക് ബിജിപാലും ശ്രീനാഥ് ശിവശങ്കരനുമാണ് സംഗീതം ഒരുക്കുന്നത്.
