ന്യൂഡൽഹി: അയോദ്ധ്യയിൽ ആഡംബര ഹോട്ടലുകൾ നിർമ്മിക്കാനൊരുങ്ങി ടാറ്റാ ഗ്രൂപ്പ്. ഇന്ത്യയിലെ ഏറ്റവും വലിയ ഹോസ്പിറ്റാലിറ്റി കമ്പനിയായ ഇന്ത്യൻ ഹോട്ടൽസ് കമ്പനി ലിമിറ്റഡ് (ഐഎച്ച്‌സിഎൽ) ആണ് പദ്ധതി ആവിഷ്‌കരിക്കുന്നത്. രണ്ട് പുതിയ ആഡംബര ഹോട്ടലുകൾ നിർമ്മിക്കുന്നതിനായി ഭരദ്വാജ് ഗ്ലോബൽ ഇൻഫ്രാവെഞ്ചേഴ്‌സ് പ്രൈവറ്റ് ലിമിറ്റഡുമായി കരാർ ഒപ്പിട്ടു. രാജ്യത്തൊട്ടാകെയുള്ള ആത്മീയ കേന്ദ്രങ്ങളിൽ കമ്പനിയുടെ സാന്നിധ്യം ഉറപ്പുവരുത്തുകയാണ് ലക്ഷ്യമെന്ന് ഐഎച്ച്‌സിഎൽ വ്യക്തമാക്കി. പദ്ധതി പൂർത്തിയാകുന്നതോടെ അയോദ്ധ്യയിലെ ആദ്യത്തെ ബ്രാൻഡഡ് ഹോട്ടലുകളായിരിക്കും ഇത്.
ഐഎച്ച്‌സിഎല്ലിന്റെ ഗ്രീൻഫീൽഡ് പ്രോജക്ടുകളുടെ ഭാഗമാണ് വിവാന്റാ, ജിഞ്ചർ ബ്രാന്ഡുകൾക്ക് കീഴിൽ നിർമ്മിക്കുന്ന ഹോട്ടലുകൾ. രാജ്യത്തിന്റെ മുഖച്ഛായ തന്നെ മാറ്റിയ ഐഎച്ച്‌സിഎല്ലുമായി പങ്കാളിത്തം സൃഷ്ടിക്കാൻ കഴിഞ്ഞതിൽ ഏറെ സന്തോഷവും അഭിമാനവുമുണ്ടെന്ന് ഭരദ്വാജ് ഗ്ലോബൽ ഇൻഫ്രാവെഞ്ചേഴ്‌സ് പ്രൈവറ്റ് ലിമിറ്റഡിന്റെ ഡയറക്ടർ രാമേന്ദ്ര പ്രതാപ് സിംഗ് വ്യക്തമാക്കി. പദ്ധതിയുടെ ഭാവിയെ സംബന്ധിച്ച് ഏറെ ആവേശത്തിലാണെന്ന് പ്രോജക്ട് ഹെഡ് ശിവേന്ദ്ര പ്രതാപ് സിംഗ് പറഞ്ഞു. പദ്ധതി 2024-ന് മുൻപായി പൂർത്തീകരിക്കാനാണ് പദ്ധതിയിടുന്നതെന്നും കമ്പനി വ്യക്തമാക്കി.
അഞ്ച് ഏക്കർ സ്ഥലത്ത് വ്യാപിച്ചുകിടക്കുന്ന ഹോട്ടലാകും വിവാന്റാ. 100 മുറികളുണ്ടാകും. വിശാലമായ റെസ്‌റ്റോറന്റ്, വലിയ വിരുന്ന് ഇടങ്ങൾ, വിശാലമായ സ്വിമ്മിംഗ് പൂളുകൾ, ഹെൽത്ത് ക്ലബ്, പാർക്കിംഗ് ഏരിയ, മറ്റ് ആധുനിക സംവിധാനങ്ങൾ എന്നിവ വിവാന്റയിലുണ്ടാകും. ഇവ രണ്ടും കൂടി ചേരുന്നതോടെ ഐഎച്ച്‌സിഎല്ലിന് താജ്, സെലിക്യുഷൻസ്, വിവാന്റാ, ജിഞ്ചർ ബ്രാൻഡുകളിലായി ഉത്തർപ്രദേശിലെ ഹോട്ടലുകളുടെ എണ്ണം 19 ആകും. ഇതിൽ ഒമ്പതെണ്ണത്തിന്റെ നിർമ്മാണം പുരോഗമിച്ചുകൊണ്ടിരിക്കുകയാണ്. ലക്‌നൗ, വരാണാസി എന്നിവിടങ്ങളിൽ ട്രാവൽ സർക്യൂട്ട് പൂർത്തീകരിക്കുമെന്നും ഐഎച്ച്‌സിഎൽ അറിയിച്ചിട്ടുണ്ട്.
