ന്യൂഡൽഹി: കോൺഗ്രസ് അദ്ധ്യക്ഷൻ മല്ലികാർജ്ജുൻ ഖാർഗെയുടെ വിഷപാമ്പ് പരാമർശത്തിൽ കോൺഗ്രസിനെതിരെ രൂക്ഷ വിമർശനവുമായി ധനമന്ത്രി നിർമലാ സീതാരാമൻ. പ്രധാനമന്ത്രി നരേന്ദ്രമോദിക്കെതിരായി ഖാർഗെ നടത്തിയ പരാമർശത്തെ അപലപിച്ച അവർ കോൺഗ്രസിനെതിരെയും അതിരൂക്ഷമായി വിമർശിച്ചു. കോൺഗ്രസ് പാർട്ടിയുടെ നിലവിലെ മാനസികാവസ്ഥയാണ് ഖാർഗെയുടെ പ്രസ്താവനയിൽ നിന്നും പ്രതിഫലിക്കുന്നതെന്ന് ധനമന്ത്രി പറഞ്ഞു.
ഒരുവശത്ത് ഭാരത് ജോഡോ യാത്ര നടത്തി രാഹുൽ സ്നേഹത്തിന്റെ ‘കടകൾ’ തുറക്കുമ്പോൾ മറുവശത്ത് അവരുടെ പാർട്ടി അദ്ധ്യക്ഷൻ പ്രധാനമന്ത്രിക്കെതിരെ ഇത്തരം വാക്കുകൾ ഉപയോഗിക്കുകയാണ്. മല്ലുകാർജ്ജുൻ ഖാർഗെ മാപ്പുചോദിക്കണമെന്നും നിർമലാ സീതാരാമൻ പറഞ്ഞു.
അതേസമയം ഖാർഗെയുടെ പരാമർശം വലിയ വിവാദത്തിന് തിരികൊളുത്തിയതോടെ ന്യായീകരണ ട്വീറ്റുമായി അദ്ദേഹം രംഗത്തെത്തിയിരുന്നു. പ്രധാനമന്ത്രിയെ വ്യക്തിപരമായി അധിക്ഷേപിച്ചതല്ലായെന്നും ബിജെപിയുടെ പ്രത്യയശാസ്ത്രത്തിനെതിരെയാണ് സംസാരിച്ചതെന്നും ഖാർഗെ ന്യായീകരിച്ചു. ബിജെപിയുടെ പ്രത്യയശാസ്ത്രം വിദ്വേഷം നിറഞ്ഞതും ദരിദ്രരെയും ദളിതുകളെയും മുൻവിധിയോടെ കാണുന്നതുമാണ്. വിദ്വേഷത്തിന്റെ രാഷ്ട്രീയമാണ് ചർച്ച ചെയ്തത്. തന്റെ പ്രസ്താവന പ്രധാനമന്ത്രി മോദിക്കെതിരെയോ മറ്റേതെങ്കിലും വ്യക്തിക്ക് വേണ്ടിയോ ആയിരുന്നില്ലെന്നും ഖാർഗെ പ്രതികരിച്ചു.
