രാജസ്ഥാൻ നായകൻ സഞ്ജു സാാസണിനെ പുകഴ്ത്തി മുൻ ഇന്ത്യൻ പരിശീലകൻ രവി ശാസ്ത്രി. മുൻ ഇന്ത്യൻ നായകനും ചെന്നൈ സൂപ്പർകിംഗ്സ് ക്യാപ്റ്റനുമായ സാക്ഷാൽ ധോണിയുമായാണ് രവി ശാസ്ത്രി സഞ്ജുവിനെ താരതമ്യപ്പെടുത്തിയത്. ഇന്ത്യൻ പ്രീമിയർ ലീഗിൽ ചെന്നൈയ്ക്കെതിരെ രണ്ടാം ജയവും നേടി പോയിന്റ് പട്ടികയിൽ ഒന്നാമതെത്തിയതിന് പിന്നാലെയായിരുന്നു രവി ശാസ്ത്രിയുടെ പരാമർശം.
ധോണിയെ പോലെ തന്നെ കഴിവുകളുള്ള താരമാണ് സഞ്ജുവെന്നായിരുന്നു രവി ശാസ്ത്രി പറഞ്ഞത്. ഏത് സമ്മർദ്ദഘട്ടത്തിലും വളരെ ശാന്തനും സമചിത്തതയോടെ തീരുമാനമെടുക്കുന്നവനുമാണ് സഞ്ജു. അദ്ദേഹത്തിൽ ധോണിയുടെ അതേ മികവുകളുണ്ടെന്നും ശാസ്ത്രി പറഞ്ഞു. സഞ്ജുവിന്റെ ക്യാപ്റ്റൻസി ഞാൻ വളരെ കുറച്ചേ കണ്ടിട്ടുള്ളു. പക്ഷേ കണ്ടതിൽവെച്ച് തന്നെ എനിക്ക് പറായാനാവും. അവൻ ധോണിയെപ്പോലെ ശാന്തനും സമചിത്തത വെടിയാത്ത നായകനുമാണ്. സഹതാരങ്ങളോട് തന്റെ മുഖത്തെ വികാരങ്ങൾ പ്രകടിപ്പിക്കാത്ത സഞ്ജുവിന് അവരോട് നല്ലരീതിയിൽ ആശയവിനിമയം നടത്താനും മിടുക്കുണ്ട്. സഞ്ജു ക്യാപ്റ്റനായി കൂടുതൽ മത്സരങ്ങൾ കളിക്കുന്തോറം അവൻ കൂടുതൽ പരിചയ സമ്പന്നനാകുമെന്നും രവി ശാസ്ത്രി പറഞ്ഞു.
'Calm, composed' – Sanju Samson has the qualities of MS Dhoni, says Ravi Shastri #IPL2023 #RRvCSK #T20TimeOut pic.twitter.com/AW5WscsfTw
— ESPNcricinfo (@ESPNcricinfo) April 28, 2023
മത്സരത്തിൽ 32 റൺസായിരുന്നു രാജസ്ഥാന്റെ ജയം. ചെപ്പോക്കിലെ തോൽവിക്ക് പകരം വീട്ടാനിറങ്ങിയ ചെന്നൈയ്ക്ക് ജയ്പൂരിലും പരാജയത്തോടെ മടങ്ങനായിരുന്നു വിധി. 203 റൺസ് പിന്തുടർന്നിറങ്ങിയ ചെന്നൈയ്ക്ക് 20 ഓവറിൽ ആറ് വിക്കറ്റ് നഷ്ടത്തിൽ 170 റൺസ് എടുക്കാനേ കഴിഞ്ഞുള്ളൂ. ജയത്തോടെ രാജസ്ഥാൻ റോയൽസ് പോയിന്റ് പട്ടികയിൽ വീണ്ടും ഒന്നാമതെത്തി. മത്സരത്തിന് ശേഷം ക്രിക്ഇൻഫോയിൽ സംസാരിക്കുമ്പോഴാണ് രരവി ശാസ്ത്രി സഞ്ജു സാംസനെ വാനോളം പുകഴ്ത്തിയത്.
Comments