ബെംഗ്ളൂരു: കർണാടക തിരഞ്ഞെടുപ്പിനോട് അനുബന്ധിച്ച് റോഡ് ഷോയ്‌ക്കിടെ പകർത്തിയ പ്രധാനമന്ത്രി നരേന്ദ്രമോദിയുടെ ചിത്രം വൈറൽ. റോഡ് ഷോയ്‌ക്കിടയിൽ കണ്ട ഹനുമാന്റെ പ്രതിമയ്‌ക്ക് മുന്നിൽ നരേന്ദ്രമോദി കൈകൂപ്പി തൊഴുന്ന ചിത്രമാണ് വൈറലായിരിക്കുന്നത്. കർണാടകയിൽ ബജ്‌റംഗ്ദൾ വിവാദം കത്തി നിൽക്കുന്ന സാഹചര്യത്തിലാണ് പ്രധാനമന്ത്രിയുടെ ഇത്തരത്തിലുള്ള ഒരു ചിത്രം വൈറലായിരിക്കുന്നതെന്നതാണ് ശ്രദ്ധേയം.
സംസ്ഥാനത്ത് അധികാരത്തിലെത്തിയാൽ ബജ്‌റംഗ്ദളിനെ നിരോധിക്കുമെന്ന് കോൺഗ്രസ് പ്രഖ്യാപിച്ചിരുന്നു. ഇതിനെ രൂക്ഷമായ ഭാഷയിലാണ് പ്രധാനമന്ത്രി വിമർശിച്ചത്. പ്രീണനത്താൽ കോൺഗ്രസിന്റെ കാഴ്ച നഷ്ടപ്പെട്ടുവെന്നും ശ്രീരാമദാസനായ ബജ്‌റംഗ്ബലിയുടെ നാമം കേൾക്കുന്നതുപോലും കോൺഗ്രസിന് അസഹനീയമായിരിക്കുന്നുവെന്നും പ്രധാനമന്ത്രി പറഞ്ഞു. ഇതിന് പിന്നാലെയാണ് ബജ്‌റംഗ്ബലിയെ വണങ്ങുന്ന അദ്ദേഹത്തിന്റെ ചിത്രം വൈറലായിരിക്കുന്നത്.
തിരഞ്ഞെടുപ്പിനോട് അനുബന്ധിച്ച് വൻ പ്രചരണമാണ് പ്രധാനമന്ത്രി കർണാടകയിൽ ക്യാമ്പ് ചെയ്ത് നടത്തുന്നത്. ഇന്ന് ബെംഗളുരു അർബൻ മേഖലയിൽ 26 കിലോമീറ്റർ ദൂരത്തിൽ അദ്ദേഹം റോഡ് ഷോ നടത്തി. വൻ ജനപങ്കാളിത്തമാണ് പരിപാടിയിൽ പ്രകടമായത്.
