മലപ്പുറം: പൊന്നാനിയിലെ ഉല്ലാസ ബോട്ട് സർവീസ് നിർത്തിവെച്ചു. ഉല്ലാസ ബോട്ട് സർവീസ് നിർത്തിയതറിയിച്ച് നഗരസഭ ഉത്തരവിറക്കിയിട്ടുണ്ട്. താനൂരിലെ ബോട്ട് അപകടത്തിന്റെ പശ്ചാത്തലത്തിലാണ് പൊന്നാനിയിലും നടപടി സ്വീകരിച്ചിരിക്കുന്നത്. സുരക്ഷാ പരിശോധനകൾക്ക് ശേഷം മാത്രം സർവീസ് നടത്തിയാൽ മതിയെന്നും നഗരസഭ അറിയിച്ചു.
സർവീസ് പുനരാരംഭിക്കുന്നതിന് മുൻപ് ഫിറ്റ്നസ് ഉൾപ്പെടെയുള്ള രേഖകൾ ഹാജരാക്കാൻ ബോട്ടുടമകൾക്ക് നഗരസഭ നിർദ്ദേശം നൽകിയിട്ടുണ്ട്. കൂടാതെ വനംവകുപ്പിന് കീഴിൽ സർവീസ് നടത്തുന്ന എല്ലാ ബോട്ടുകളും പരിശോധിക്കാൻ മന്ത്രി എകെ ശശീന്ദ്രനും നിർദ്ദേശം നൽകിയിട്ടുണ്ട്. ഒരാഴ്ചയ്ക്കകം എല്ലാ ബോട്ടുകളും പരിശോധിക്കാൻ വനംവകുപ്പ് മേധാവിക്കാണ് മന്ത്രി നിർദേശം നൽകിയിരിക്കുന്നത്.
നടപടിയുടെ ഭാഗമായി തേക്കടി ഉൾപ്പെടെയുള്ള ഫോറസ്റ്റ് ടൂറിസം കേന്ദ്രങ്ങളിൽ പരിശോധന നടത്തും. പരിശോധനയിൽ സുരക്ഷയില്ലാത്ത ബോട്ടുകൾ കണ്ടെത്തിയാൽ സർവീസ് ഉടൻ നിർത്തിവയ്ക്കണമെന്നാണ് നിർദ്ദേശം.
Comments