ചെന്നൈ: തമിഴ്നാട് മുഖ്യമന്ത്രി എംകെ സ്റ്റാലിന്റെ കുടുംബത്തിലെ അഴിമതികളെ കുറിച്ചുള്ള ശബ്ദസന്ദേശം പുറത്തായതിനെ തുടർന്ന് പുതിയ ധനമന്ത്രി വന്നേക്കുമെന്ന് സൂചന. നിലവിലെ ധനമന്ത്രി ത്യാഗരാജന് പകരം ആയിരിക്കും പുതിയ ധനമന്ത്രി എത്തുക. രണ്ട് ദിവസത്തിനുള്ളിൽ മന്ത്രിസഭ പുനഃസംഘടന ഉണ്ടായേക്കുമെന്നും പുതിയ ധനമന്ത്രിയെ തിരഞ്ഞെടുക്കുമെന്നുമാണ് റിപ്പോർട്ടുകൾ.
എന്നാൽ ത്യാഗരാജനെ പൂർണമായും മാറ്റിനിർത്തില്ലെന്നും ഐടി വകുപ്പ് ഇദ്ദേഹത്തിന് നൽകിയേക്കുമെന്നും റിപ്പോർട്ടുകളുണ്ട്. നിലവിലെ വ്യവസായ മന്ത്രി തങ്കം തെന്നരസുവിനെ ധനമന്ത്രിയാക്കാൻ സാധ്യതയുണ്ടെന്ന് പാർട്ടി വൃത്തങ്ങൾ പറയുന്നു.’ദ്രാവിഡ മോഡൽ’ സർക്കാരിന്റെ രണ്ടാം വർഷികം ആഘോഷിക്കുന്നതിനുള്ള പ്രചാരണ പരിപാടികളിൽ നിന്നും ത്യാഗരാജൻ വിട്ടുനിൽക്കാൻ സാധ്യതയുണ്ടെന്നും പാർട്ടി വൃത്തങ്ങൾ പറയുന്നു.
അതേസമയം ഓഡിയോയിലെ ശബ്ദം തന്റേതല്ലെന്നാണ് ത്യാഗരാജന്റെ ന്യായീകരണം. എന്നാൽ ഓഡിയോ പുറത്തുവിട്ടവർക്കെതിരെ നിയമനടപടി സ്വീകരിച്ചിട്ടുമില്ല. രാഷ്ട്രീയ നിരീക്ഷകനും അന്വേഷണാത്മക മാധ്യമസ്ഥാപനമായ സവുക്കുവിന്റെ എഡിറ്ററുമായ എ ശങ്കർ ആണ് ആദ്യത്തെ ഓഡിയോ പുറത്തുവിട്ടത്.
Comments