സമൂഹമാദ്ധ്യമങ്ങളിൽ നിന്ന് ഇടവേളയെടുക്കുന്നതായി നടി നസ്രിയ. ഇൻസ്റ്റഗ്രാമിൽ പങ്കുവെച്ച കുറിപ്പിലാണ് ഇക്കാര്യം ആരാധകരെ അറിയിച്ചത്. താൻ എല്ലാ സോഷ്യൽ മീഡിയാ പ്ലാറ്റ്ഫോമുകളിൽ നിന്ന് ബ്രേക്ക് എടുക്കുന്നുവെന്നാണ് നസ്രിയ കുറിച്ചത്.
‘എല്ലാ സോഷ്യൽ മീഡിയ പ്ലാറ്റ്ഫോമുകളിൽ നിന്നും ഇടവേള എടുക്കുകയാണ്. ഇതാണ് അതിനുള്ള സമയം. നിങ്ങളുടെ സ്നേഹവും സന്ദേശങ്ങളുമെല്ലാം മിസ് ചെയ്യും… ഉടനെ തിരിച്ചുവരും..പ്രോമിസ്…’ എന്നായിരുന്നു നസ്രിയയുടെ വാക്കുകൾ. സിനിമകളിൽ നിന്ന് ബ്രേക്ക് എടുക്കാറുണ്ടെങ്കിലും ഇൻസ്റ്റഗ്രാമിൽ സജീവമായിരുന്നു നസ്രിയ. കുടുംബവും സുഹൃത്തുക്കളുമൊത്തുള്ള ചിത്രങ്ങളും വിശേഷങ്ങളും താരം ഇൻസ്റ്റഗ്രാമിൽ പങ്കുവെയ്ക്കാറുണ്ട്. താരത്തിന്റെ ഇൻസ്റ്റഗ്രാം അടക്കമുള്ള സമൂഹമാദ്ധ്യമ അക്കൗണ്ടുകൾക്ക് നിരവധി ഫോളോവേഴ്സുള്ളത്. 6.8 ദശലക്ഷം ഫോളോവേഴ്സാണ് ഇൻസ്റ്റഗ്രാമിലുള്ളത്. ഫേസ്ബുക്കിൽ 9.6 ദശലക്ഷം പേരുമുണ്ട്.
കഴിഞ്ഞ വർഷം റിലീസ് ചെയ്ത തെലുങ്ക് ചിത്രം ‘അണ്ടേ സുന്ദരനാകിയിലാണ്’ നസ്രിയ അവസാനം പ്രത്യക്ഷ്യപ്പെട്ടത്. 2006-ൽ ‘പളുങ്ക്’ എന്ന മമ്മൂട്ടി ചിത്രത്തിലൂടെയാണ് താരം സിനിമാമേഖലയിലേക്ക് കടന്നുവന്നത്. പിന്നീട് ‘ഒരുനാൾ കനവ്’ എന്ന തമിഴ് ചിത്രത്തിലും 2010ൽ ‘പ്രമാണി’, ‘ഒരുനാൾ വരും’ എന്നീ മലയാള ചിത്രങ്ങളിലും അഭിനയിച്ചു.
