ന്യൂഡൽഹി: ഇൻഡിഗോ വിമാനത്തിൽ വച്ച് എയർ ഹോസ്റ്റസിനോട് അപമര്യാദയായി പെരുമാറിയ വിമാന യാത്രികൻ അറസ്റ്റിൽ. ദുബായിൽ നിന്ന് അമൃത്സറിലേക്ക് വരികയായിരുന്ന 6ഇ 1428 വിമാനത്തിൽ വച്ചായിരുന്നു സംഭവം. അമൃത്സറിൽ വിമാനം ലാൻഡ് ചെയ്തയുടനെ ഞായറാഴ്ച രാത്രി എട്ട് മണിയോടെ പ്രതിയെ പോലീസ് അറസ്റ്റ് ചെയ്തു. പഞ്ചാബിലെ ജലന്ധർ സ്വദേശിയായ രജീന്ദർ സിംഗാണ് അറസ്റ്റിലായത്.
പ്രതി വിമാനയാത്രക്കിടെ അമിതമായി മദ്യപിച്ചിരുന്നു. സ്വബോധം നഷ്ടപ്പെട്ട ഇയാൾ വിമാനത്തിനുള്ളിലെ വനിതാ ജീവനക്കാരിയോട് മോശമായി പെരുമാറി. സംഭവസമയത്ത് വിമാനത്തിലെ മറ്റ് ജീവനക്കാരായിരുന്നു വിഷയം കൈകാര്യം ചെയ്തത്. പിന്നീട് എയർപോർട്ട് അധികൃതരെ വിവരം അറിയിച്ചതോടെ ലാൻഡിംഗിന് ശേഷം പ്രതി അറസ്റ്റിലായി. ഇയാളെ കസ്റ്റഡിയിലെടുത്ത് ചോദ്യം ചെയ്ത് വരികയാണ്.
Comments