തിരുവനന്തപുരം: സംസ്ഥാനത്തെ സ്‌കൂളുകളിൽ ജൂൺ ഒന്നിന് പ്രവേശനോത്സവം നടത്തുമെന്ന് വിദ്യാഭ്യാസ മന്ത്രി വി ശിവൻകുട്ടി. മുഖ്യമന്ത്രി പിണറായി വിജയൻ പ്രവേശനോത്സവത്തിന്റെ സംസ്ഥാനതല ഉദ്ഘാടനം നിർവ്വഹിക്കുമെന്നും അദ്ദഹം പറഞ്ഞു. ഇത്തവണ കുട്ടികൾക്ക് വൻവരവേൽപ്പാണ് നൽകാൻ ഉദ്ദേശിക്കുന്നതെന്നും മന്ത്രി കൂട്ടിച്ചേർത്തു. തിരുവനന്തപുരം മലയൻകീഴ് ഗവൺമെന്റ് ബോയ്‌സ് എൽ.പി.എസിൽ പ്രവേശനോത്സവത്തിന്റെ സംസ്ഥാനതല ഉദ്ഘാടനം നടക്കും.
ഉദ്ഘാടന ചടങ്ങിന്റെ തത്സമയ സംപ്രേക്ഷണം എല്ലാ സ്‌കൂളുകളിലും കൈറ്റ് വിക്ടെഴ്‌സ് ചാനൽ വഴി പ്രദർശിപ്പിക്കും. ഒപ്പം എല്ലാ സ്‌കൂളുകളിലും ജനപ്രതിനിധികൾ അടക്കമുള്ളവരുടെ നേതൃത്വത്തിൽ പ്രാദേശിക ചടങ്ങുകൾ നടക്കും. പ്രവേശനോത്സവത്തിന് മുന്നോടിയായി സ്‌കൂളുകളഴിലെ തയ്യാറെടുപ്പുകൾ വിലയിരുത്തുന്നതിന് മുഖ്യമന്ത്രി 22-ന് ഉന്നതതല യോഗം ചേരും. വിദ്യാഭ്യാസ മന്ത്രി, തദ്ദേശ സ്വയംഭരണ – എക്‌സൈസ്, ഗതാഗതം, വൈദ്യുതി, പട്ടികജാതി- പട്ടികവർഗ – പിന്നാക്ക വിഭാഗ ക്ഷേമ, ദേവസ്വം വകുപ്പ് മന്ത്രിമാർ, ചീഫ് സെക്രട്ടറി, അഡീഷണൽ ചീഫ് സെക്രട്ടറി (ആഭ്യന്തരം ) തദ്ദേശ സ്വയംഭരണം തുടങ്ങി ബന്ധപ്പെട്ട വകുപ്പ് സെക്രട്ടറിമാർ, പൊതു വിദ്യാഭ്യാസ ഡയറക്ടർ തുടങ്ങിയവർ യോഗത്തിൽ പങ്കെടുക്കും.
21 മുതൽ 27 വരെ സംസ്ഥാനത്തെ എല്ലാ സ്‌കൂളുകളിലും ശുചീകരണ പരിപാടികൾ നടക്കും. ശുചീകരണ പ്രവർത്തനങ്ങളുടെ ഉദ്ഘാടനം മെയ് 21ന് കരമന ബോയ്‌സ്, കരമന ഗേൾസ് സ്‌കൂളിൽ സംസ്ഥാനതല ഉദ്ഘാടനം മന്ത്രി ശിവൻകുട്ടി നിർവഹിക്കും. ഗ്രീൻ ക്യാമ്പസ് ക്‌ളീൻ ക്യാമ്പസ് പദ്ധതിയുടെ ഭാഗമായുള്ള പ്രവർത്തനം ആണിത്.
