ലക്നൗ: ഉത്തർപ്രദേശിൽ ഗുരുതരമായ രോഗങ്ങൾ കാരണം ബുദ്ധിമുട്ട് അനുഭവിക്കുന്നവർക്ക് സാമ്പത്തിക സഹായം നൽകാനൊരുങ്ങി യോഗി സർക്കാർ. ഗുരുതരമായ രോഗങ്ങൾ പിടിപ്പെട്ടവർക്ക് സാമ്പത്തിക സഹായം നൽകണമെന്ന് മുഖ്യമന്ത്രി യോഗി ആദിത്യനാഥ് ഉദ്യോഗസ്ഥർക്ക് നിർദ്ദേശം നൽകി. ഗോരഖ്നാഥ് ക്ഷേത്രത്തിലെ മഹന്ത് ദിഗ്വിജയ്നാഥ് സ്മൃതി ഭവന് മുന്നിൽ നടന്ന ജനതാ ദർശനത്തിനിടെയാണ് മുഖ്യമന്ത്രി ഇക്കാര്യം വ്യക്തമാക്കിയത്.
രോഗികളുടെ ചികിത്സയ്ക്ക് ധനസഹായം നൽകുന്നതിനുള്ള അപേക്ഷകൾ എത്രയും വേഗം സർക്കാരിലേക്ക് അയയ്ക്കാൻ മുഖ്യമന്ത്രി ഉദ്യോഗസ്ഥരോട് നിർദ്ദേശിച്ചു. ഗുരുതരമായ രോഗങ്ങളാൽ കഷ്ടപ്പെടുന്ന രോഗികൾക്ക് മികച്ച ആശുപത്രികളിൽ ചികിത്സ നൽകുമെന്നും പണമില്ലാത്തത് ചികിത്സയ്ക്ക് തടസമാകില്ലെന്നും മുഖ്യമന്ത്രി പറഞ്ഞു. ജനങ്ങളുടെ പരാതികൾക്ക് അടിയന്തിരമായി പരിഹാരം കാണുമെന്ന് അദ്ദേഹം ഉറപ്പുനൽകി.
ചികിത്സയ്ക്ക് ധനസഹായം ആവശ്യമായുള്ള മുഴുവൻ ആളുകൾക്കും ഇത് സംബന്ധിച്ചുള്ള നടപടികൾ പൂർത്തിയാകുമ്പോൾ ചികിത്സാ സഹായത്തിന് ഫണ്ട് അനുവദിക്കുമെന്നും മുഖ്യമന്ത്രി ഉറപ്പുനൽകി. ഗോരഖ്പൂരിന് പുറത്തുള്ള നിരവധി ജനങ്ങളും ജനതാ ദർശനത്തിന് പങ്കാളികളായി.
Comments