തിരുവനന്തപുരം: പൊന്നമ്പലമേട്ടിൽ പ്രവേശിച്ച് പൂജ നടത്തിയത് വനം വകുപ്പ് വാച്ചർമാരുടെ അനുമതിയോടെയെന്ന് നാരായണൻ നമ്പൂതിരി. തൃശ്ശൂരിൽ വടക്കുംനാഥ ക്ഷേത്രത്തിനടുത്താണ് താൻ താമസിക്കുന്നതെന്നും ശബരിമല കീഴശാന്തിയുടെ സഹായിയായി ജോലി ചെയ്തിട്ടുണ്ടെന്നും അദ്ദേഹം പറഞ്ഞു. തീർത്ഥാടനം നടത്തുന്ന സ്ഥലങ്ങളിലെല്ലാം പൂജ ചെയ്തു പ്രാർത്ഥിക്കാറുണ്ടെന്നും അദ്ദേഹം പറഞ്ഞു.
എല്ലാ വർഷവും താൻ ശബരിമലയിൽ സന്ദർശനം നടത്താറുണ്ട്. അയ്യപ്പ ഭക്തനും തീർത്ഥാടകനുമാണെന്നും നാരായണൻ നമ്പൂതിരി പറഞ്ഞു. താൻ ഹിമാലയത്തിൽ പോകുമ്പോഴും ഇങ്ങനെയാണ് ചെയ്യാറുള്ളത്. പൊന്നമ്പലമേട്ടിൽ പോയപ്പോഴും പൂജ ചെയ്യണമെന്ന് ആഗ്രഹം തോന്നി ചെയ്തതാണ്. തനിക്കൊപ്പം ഉണ്ടായിരുന്നത് പൂജാ സാധനങ്ങൾ കൊണ്ടുവന്നവരാണെന്നും അദ്ദേഹം വ്യക്തമാക്കി.
പൊന്നമ്പല മേട്ടിൽ പൂജ നടത്തിയാൽ എന്താണ് തെറ്റ്. അയ്യപ്പനു വേണ്ടി മരിക്കാനും താൻ തയ്യാറാണെന്നും നാരായണൻ നമ്പൂതിരി പറഞ്ഞു. പൊന്നമ്പല മേട്ടിൽ ആദ്യമായാണ് താൻ പോകുന്നത്. പൊന്നമ്പല മേട് അതീവസുരക്ഷ മേഖലയാണെന്ന് തനിക്ക് അറിയില്ലായിരുന്നു. വാർത്തകളിലൂടെയാണ് ഇക്കാര്യം താൻ അറിഞ്ഞതെന്നും നാരായണൻ നമ്പൂതിരി വ്യക്തമാക്കി.
