സ്വർണം കടത്താൻ ശ്രമിച്ച മലയാളി യുവതിയെ പോലീസ് അറസ്റ്റ് ചെയ്തു ; ഒരു കോടിയിലധികം രൂപയുടെ സ്വർണം പോലീസ് പിടിച്ചെടുത്തു

കോഴിക്കോട് : ഒരു കോടിയിലധികം രൂപയുടെ സ്വർണം നാട്ടിലേയ്‌ക്ക് കടത്താൻ ശ്രമിച്ച മലയാളി യുവതി പോലീസ് പിടിയിലായി. കോഴിക്കോട് കുന്നമംഗലം സ്വദേശി ഷബ്‌നയാണ് പിടിയിലായത്. കരിപ്പൂർ വിമാനത്താവളത്തിൽ വെച്ച് ഇവരെ പോലീസ് പിടികൂടി അറസ്റ്റ് ചെയ്തു.

സൗദിഅറേബ്യയിൽ നിന്നുമാണ് ഒരു കോടിയലധികം രൂപ വിലമതിക്കുന്ന സ്വർണം നാട്ടിലേയ്‌ക്ക് കടത്താൻ ശ്രമിച്ചത്. പോലീസിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് ജിദ്ദയിൽ നിന്ന് സ്വകാര്യ വിമാനത്തിലെത്തിയ യുവതിയെ പോലീസ് സംഘം പിടികൂടിയത്. തുടർന്ന് നടത്തിയ പരിശോധനയിലാണ് ഇവരുടെ പക്കൽ നിന്നും സ്വർണം കണ്ടെടുത്തത്. സ്വർണം മിശ്രിത രൂപത്തിൽ ശരീരത്തിനുള്ളിൽ ഒളിപ്പിച്ച നിലയിലായിരുന്നതായി ഉദ്യോഗസ്ഥർ അറിയിച്ചു.
യുവതിയിൽ നിന്ന് പിടിച്ചെടുത്ത സ്വർണത്തിന് വിപണിയിൽ ഒരു കോടിയിലധികം രൂപ വിലവരുമെന്നും ഉദ്യോഗസ്ഥർ വ്യക്തമാക്കി. ഇതുമായി ബന്ധപ്പെട്ട് കൂടുതൽ അന്വേഷണം നടത്തുന്നതായി പോലീസ് ഉദ്യോഗസ്ഥർ അറിയിച്ചു.

അന്താരാഷ്‌ട്ര വിമാനത്താവളത്തിൽ നിന്ന് സമീപ ദിവസങ്ങളിലായി നിരവധി സ്വർണക്കടത്ത് കേസുകൾ റിപ്പോർട്ട് ചെയ്യപ്പെടുന്നതായി അധികൃതർ അറിയിച്ചു.